Kitai iban anang enda meransang diri bejaku ngena leka jaku
kitai empu dalam semua pengawa ke dikereja kitai ninting hari.
Kelebih agi diatu baka ke selalu didinga kitai nengah radio,
ari ke bepuluh- puluh chanel semina siti WAI FM 101.30 ke endang 99.99% jaku kitai iban lalu
siti ianya CATs FM semina 40%. Arinya tadi kitai betatika kati ke chara kitai tau
ngasuh jaku iban tu nyadi ke pilih tauka selalu didinga raban bansa kitai iban
empu. Enti deka beperindang ningaka lagu ke rentak kemaya hari tu, ke
dikerinduka bala nembiak , jangka aku mayuh agi ke deka masang tauka mendingka chanel
program English enggau Bahasa Melayu ari ke ninga program dalam jaku kitai
iban. Ukai aku nyalahka kitai iban ke deka ninga tauka meding ke program dalam
jaku bansa bukai, laban nya hak siku-siku.
Tang aku meransang kitai ngena medium tu kena kitai negap sereta
ngetanka jaku iban ngambika enda abis di bai arus pemasang jaku ke endang udah
tegap baka bahasa English, Melayu, Cina enggau Tamil ba menua kitai di Malaysia
tu.
 |
| Gambar Pengias |
“Nengah chara tu kitai ulih ngenanka jaku Iban ari ke lenyau
ngapa enda diguna baka sekeda jaku bansa bukai ke nadai agi diguna kelebih agi
ba bala nembiak rebak baru diatu,” ku Jabu.
“Jaku Iban deka lenyau enti kita enda berani nguna tauka
malu bejaku ngena jaku diri empu. Tambah mega, raban bansa Iban ke diau di
nengeri tu tau lenyau adat ke dikembuan kenyau ari aki ini kitai kelia. Nya
alai, aku meransang kitai ke bansa Dayak anang malu nguna jaku bansa diri empu
laban jaku Iban chukup mayuh guna ngagai kitai Dayak,” ku Jabu.
Jabu mega meransang raban bansa Iban ke ngembuan pelajar
tinggi sama beserakup ngangkat sereta ngemansangka jaku Iban awakka ulih
mansang baka jaku bansa bukai lalu diguna ba tikas ke lebih tinggi.
“Taja pia, kitai patut ngubah runding enggau chara bepikir
ba kitai Dayak kelebih agi bala nembiak kemaya hari tu.
“Kitai patut meri sukung ke chukup badas ngagai raban
nembiak sereta ngelalau ngena jaku ajar minta sida belajarka jaku Iban nyentuk
ngagai tikas ke pemadu tinggi,” ku iya.
Iya mega madahka bala raban pengajar patut diberi kus dikena
sida nambahka pengelandik sereta ngemansangka jaku Iban ke diajar sida ba
sekula.
Jaku Iban ukai semina dipelajarka ba sekula primari enggau
sekondari aja, tang mega patut dipelajar sampai ngagai tikas ke lebih tinggi
baka palan pematih pengajar tauka universiti.
“Mayuh bengkah chara dikena ngemansangka jaku Iban. Seiti
ari chara ke mujur ulih meri pemansang iya nya ngaga mayuh pansik bekaul enggau
jaku Iban.
 |
| Gambar Pengias |
“Bala Raban Gerempung Ukai Perintah (NGO) mega patut
nunjukka sukung sida dikena ngemansangka jaku Iban sampai ngagai tikas ke
pemadu tinggi,” ku Jabu lebuh dirandau raban pemberita.
Tu meh sekeda ari utai ke dipadahka ia nitih ke bisi dipandangka
ba surat khabar Utusan Borneo 13/09/2014 lebuh nya kemari.
Aku amat temegah hati meda pemansang enggau
pengeran hati tuai-tuai kitai iban
ngemasai ke jaku kitai iban. Kitai diatu udah bisi siti “dictionary” jaku iban
ke benama Bup Sereba Reti Jaku Iban ke ditengkebang Tun Jugah Foundation.
Nambahka nya jaku
kitai iban kelebih agi pengawa lama kitai udah di tengkebang ‘The Dayak Cultural Foundation’ enggau ‘Tun
Jugah Foundation’ ngena chara digital kelebih agi ia ke bisi disimpan Radio
Sarawak. Ngena chara tu bala generasi baru kitai iban lebih mudah belajar ke
jaku diri nengah arus pemansang dunya pemadah.Tu meh utai ti manah sereta
endang siti pengawa ke patut digaga kitai ngambika jaku kitai iban terus
dikelala semua bansa di Malaysia lalu mega di sarata dunya.
Anang malu kitai bejaku ngena jaku iban ba pasar Bandaraya Kuching,
Bandaraya Miri, Bandaraya Kuala Lumpur, Singapore, London, Frankfurt Germany
enggau semua bandaraya di dunya tu.
