Kredit: FB Andrew Paul
Enti kitai ngenang “rampa peda”(vision) tuai-tuai bansa Cina & India ke dulu suba. Sida sigi jauh “dulu” ari utai peda tuai-tuai Bansa kitai Dayak; kebuah aku nyebut munyi nya laban sida kenyau ari merdeka udah ngering ke jaku bansa diri lalu ngujung ke sida ulih ngatur jaku sida dikena ba pengawa sekula baka bagi chara ke Lumur-2. Diatu tuai-tuai sida ke ba generasi ke dudi agi nyau ulih nambah ke guna jaku sida sampai ke bansa sida nyau bisi University kediri.
Tang enggi kitai Iban enda ga bangat ngutuk, laban tuai-tuai ke dulu suba udah ulih ngemasuk ke Jaku Iban ke guna Chara ke-4 ba pengawa Sekula. Enda ngemanah chara Lumur 2, tang bisi ari ke nadai.
Tang nasib bangat enda manah..laban tuai-tuai Dayak ke nampung pengawa tuai-tuai ke dulu nya ukai semina nadai vision ngemansang ke Jaku diri, tang nyau neju ke Jaku Iban nikal ke belakang lebuh sida neju ke Borneo Literature Bureau ke giat ngeluar serta nyelak bup Iban ditutup serta nunu bup Iban dalam taun 80an.
Nya alai diatu asai sepi aku, rakyat patut angkat, laban tuai-tuai Dayak ke enggau orang megai perintah nya endang ia udah nyengala serta udah nyemetak nadai “vision” ngangkat ke Jaku Bansa diri. Laban enda patut sida ke rauh-rauh madah ke diri sayau ke bansa, angkun, taluk, enda ngemeli, enda ngakal, enda nipu serta bisi kuasa lalu seruran deka ngangkat ke pengidup bansa diri lebuh maya ke bekimpin minta serta nginti undi nya enda tepeda tauka nadai siku kala ngira vision ngagai Jaku bansa diri? Tang asai aku, sigi ukai ketegal sida enda nemu laban bansa kitai ke bisi meda lalu bisi vision dekangangkat ke Literature & Jaku Bansa diri tu suah udah madah ngagai sida tang enda ga sida ngadu nya alai retinya ba aku tuai-tuai kitai Dayak ke nyau berapuh benung nyadi YB serta nyadi Menteri enggau orang megai perintah ba jam ia ke diatu nya endang enggai ngadu tauka endang nemu diri enda ulih ngadu ketegal kuasa orang ke enggai meda Bansa Iban nya angkat.
Pesan aku anang kelalu laun laban taja udah disekat lebih 30 taun kitai agi bisi bansa diri ke ada sebedau penemu kitai nya disekat lalu agi ngembuan sereta bisi nampung mayuh penemu pasal Literature & Jaku kitai ke agi ulih besaup sama-sama berkungsi ke penemu nya enggau chara nulis sereta nyelak ke guna rebak ke dudi.
Kitai enda ulih ngandal ke rebak bansa kitai ke ada lebuh semua penemu literature & Jaku kitai nya ke udah disekat (ditutup serta ditunu) tauka rebak ke jauh dudi agi ari nya, laban sida tau dipadah ke nadai peluang bepansa enggau penemu nya.
Ooohhhaaa! Idup Iban!!!! Idup Dayak!!!
