Taja pia enti kitai berati lalu ngasaika ba menua enggau rumah panjai diri sereta berunding ba dalam ati, katika kitai tu amat udah sebaka enggau sida di seberai din ke enda? Jangka aku mudah aja kita nyaut aku, tentu ba peragam aku kita nyaut agi jauh.
Kitai di Sarawak kediatu agi apin betul-betul ngasaika buah merdeka ke diperimba bala tuai-tuai kitai iban 51 tahun ke udah. Pemisi asas baka api, ai, jalai enggau dunya pemadah enda semua genturung pendiau di menua kitai udah ensepi tauka diberi. Ba bagi orang ke megai pengawa ba perintah besai (persekutuan) sereta ba negeri kitai di Sarawak ditu pan nyau ulih di hitung enggau jari raban kitai iban & dayak bukai ke megai pengawa ke besai-besai.Pemansang pelajar raban kitai iban pan jauh tinggal enti bebanding enggau raban bansa bukai. Kebuah laban ekonomi tauka hasil ruang bilik kitai jauh agi kurang. Orang selalu nyemanaka bansa kitai iban tu mayuh pengeraja asal baka tanah. Tang sida ia enda ingat tauka sigi nemu lalu ngambi peluang tu kena ngurangka pemeri tulung ari segi duit ringgit ngagai raban bansa kitai dayak kelebih agi kitai iban.
