nemukita.blogspot.my: 09/15/16

Thursday, September 15, 2016

Selamat Hari Malaysia

Gambar Pengias

Meri selamat hari Malaysia ngagai semua rakyat Sarawak, Sabah & Tanah Malaya. Arapka penyarakup mengkang tegap sereta kering ba kitai ke nguan menua Malaysia. Tajapan mayuh macham peyerekang enggau penemu ke enda tentu ulih dikamatka ke udah di bantai parti politik di menua kitai, arapka nya enda nekul pemansang ke rebak dudi hari ila. Buai meh hati ti kepapaska bansa diri mansang lalu tanamka hati ke sama-sama bebai ngemanah sereta mansang ke mua. Maju iban mansang Dayak sereta semua bansa di Sarawak & Malaysia. SELAMAT HARI MALAYSIA

Jaku Pengelalu

Lalu kaban ngelawa bilik penaik mua tangga blog aku tu. Nadai penti' pemali, aku enggau hati ti baruh ngelaluka semua kita. Betemu kitai ba mua komputer nitih ke pemansang arus pemadah enggau komunikasi kemaya hari tu, taja pan jauh tang nyadi semak laban baka ti betungga mua duduk berimbai kerigai marang. Aku nguji bekongsi enggau kita sekeda utai ti nyadi diserata menua kitai di Kuching, Sarawak ditu enggau menua kita Malaysia ke lebih agi. Kelimpah ari nya, sekeda berita ke nyadi di menua luar mega deka dikunsika aku enggau kita. Semua berita tu ila deka diambi aku ari surat khabar lama enggau majalah ti bisi dimenua kitai. Blog tu ila mega kena aku madangka koleksi bup kitai iban enggau bup bansa bukai ke bisi dijual di Book Store ba Bandaraya Kuching ditu ambika nyadi pesaka penemu ngena rega ti patut sereta ulih dibeli kita.

Tentu kita bisi saru penemu tauka saru runding ni penatai enggau nama kebuah blog aku tu ngena nama nemukita? Kati kala kita mendingka radio WaiFM 101.3 program ti dikumbai Nemu Kita dikeluarka Aya Thomas S.T. Laka. Nya meh meri idea enggau runding ngambika iya enda semina ditemu sereta didinga ari radio aja tang awakka Nemu Kita tu mega bisi ba dunya Internet. Tang jalai enggau chara pengawa blog aku tu enda mantaika utai ti dikeluarka dalam program Nemu Kita bakaka ba WaiFM nya. Aku ukai ngiru ukai ga ngechuri tang aku deka ngerembai leka jaku kitai iban Nemu Kita tu ngambi ka iya ulih di peda urang ti nguan dunya injau kitai tu.Aku arapka kitai sama ulih bekunsi penemu lalu besaup ngerembaika jaku bansa kitai iban. Majak ngemansang ke jaku kitai iban awakka besulur baka randau makin lama makin pajai, betuchung baka bukit.

Thursday, September 15, 2016

Selamat Hari Malaysia

JAKU IBAN BA PENGAWA SEKULA