Credit: Mr. Andrew Paul
1) NAMA ANALOGY PEMAKAI MENUA?
Pemakai Menua tu = occupied territory.
Ianya setiap iti menua Iban/Dayak/Orang Asal bisi kandang occupied territory tauka kandang Pemakai Menua ia empu.
Concept tu -Sama baka sitak Bahagian: Bahagian Sri Aman bisi kandang menua ia empu lalu bakanya mega Bahagian Sibu –sigi bisi kandang menua ia empu.
Sama mega Concept Negeri –Negeri Selangor bisi kandang Negeri ia empu. lalu bakanya ga Menua Kedah pan sama bisi kandang territory ia empu.
Lalu sebaka concept baka Negara –Negara Malaysia bisi kandang menua ia empu. Menua Singapore, Menua Hong Kong, Menua America, Menua Nigeria pan bisi kandang tauka territory ia empu.
Nya alai –Pemakai Menua ba menua Dayak/Orang Asal pan sama enggau Bahagian, Negeri & Negara.
Menua Drau bisi kandang tauka Pemakai Menua tauka occupied territory ia empu. Bakanya ga Menua Ulu Budu, Menua Awik, Menua Kabo, Menua Awas, Menua Babang. Sigi bisi kandang tauka Pemakai Menua ia empu.
2)NAMA BANSA TANAH KE BISI DALAM KANDANG PEMAKAI MENUA?
Dalam kandang Pemakai menua bisi mayuh bansa Tanah NCR.
i)Tanah Temuda(Tanah Temuda tu mayuh bansa nyengkaum Tanah kebun & Tanah Jerami, Tanah Damun & Tanah Pengerang)
ii) Tanah Payung Temuda
iii)Tanah Tembawai
iv)Tanah Pendam
v)Tanah Pulau Galau(PG) –Tanah Pulau tu mayuh bansa nyengkaum Pulau Rian-Pulau Pakan, Pulau Tapang-Pulau Kedang, Pulau Bangkung-Pulau Lesung, Pulau Rutan-Pulau Danan, Pulau Buah-Pulau Getah, Pulau Minyak-Pulau Lemak, Pulau Penti-Pulau Pemali, Pulau Pantu-Pulau Sagu, Pulau Bemban –Pulau Anyam…serta mega nyengkaum Pulau ke digalau serta diempu siti-siti Ruang Bilik.
vi) Tanah Pemakai Menua tauka Tanah Kampung Asal tauka Tanah Kampung Puang –Tanah Pemakai Menua ke digalau -alai nyimpan kandang jelu babas lalu alai begiga ke semua utai guna ari babas@enda nyalah-nyalah baka supermarket. Nya alai kandang Pemakai Menua tu sigi besai –laban ia nyadi kandang alai ngasu-beburu lalu kandang tu semina mati ba boundary menua tauka antara menua tauka Garis Menua enggau siti-siti bukai ke betangkup (territorial Domain/ Occupied Territory.)
Note: Dua bansa Tanah NCR ke enda diterima tauka enda diaku L&S tauka Perintah ngelama-lama tu ianya- a) Tanah Pulau Galau (bansa Tanah item v) enggau b) Tanah Pemakai Menua tauka Kampung Asal (bansa Tanah item vi). (Note: Enggai enda nyebut….tu siti concept common law ke bisi disebut bala Hakim lalu mesti ditemu kitai ianya -Sebedau Ubah Undang-Undang Tanah Julai 2018, hal ke madah ke - a)Tanah Pulau Galau (bansa Tanah item v) enggau b) Tanah Pemakai Menua tauka Kampung Asal (bansa Tanah item vi) tu –“UKAI TANAH NCR” …nadai bisi udah ditulis enggau nyemetak ba Bub Undang-Undang Tanah Sarawak. Nya alai maioh Hakim madah ke enti nadai leka jaku ke nyemetak madah ke Tanah Pulau Galau & Pemakai Menua tu “UKAI TANAH NCR” ba bup undang-undang Tanah Sarawak…Reti ya Adat Pemakai Menua tu endang Tanah NCR nitih ke Adat Orang Asal lalu Orang Asal bisi HAK ngempu Tanah nya. Semina enti sema bisi ditulis enggau nyemetak –ba bup Undang-Undang madah ke Adat Pemakai Menua tu ukai Tanah NCR…nya baru reti ia Adat Pemakai Menua tu udah enda diguna ari segi RETI UNDANG-UNDANG. Nya alai kitai mesti ingat- lebuh maya kes pechara Tr.Sandah ba Federal Court 2016 suba..nadai leka jaku ke nyemetak madah ke Adat Pemakai Menua tu ukai Tanah NCR...nya alai reti ia Adat Pemakai Menua tu bisi kuasa nitih ke Common Law ba “maya nya”…siti concept ke suah disebut orang ke nemu pasal undang-undang…madah ke Pemutus Kes Tr. Sandah nya enda engkeman).
Tang kelimpah ari dua bengkah Tanah ke enda diaku Perintah nyadi sebengkah bansa Tanah NCR….mayuh mega kitai enda nemu: -Ba mayuh kes pechara ba court ke udah nyadi (>400 iti kes) –L&S tauka Perintah…”ukai semina enda ngaku” Tanah Pulau Galau (v) enggau Tanah Pemakai Menua-Kampung Puang (vi) dalam kandang Pemakai Menua “nya aja”. Tang sida mega udah dipeda ….a) enda ngaku mayuh bansa Tanah NCR ke bukai secara physical –baka udah saru enda ngaku Tanah Tembawai, b) Udah mayuh kes mega sida L&S enggau Perintah GPS..udah saru enda ngaku Tanah Pendam, lalu c) 'sama ada' sengaja tauka enda sengaja...sida L&S tauka Perintah mega udah enda ngaku “TANAH TEMUDA”-….(Retinya-taja pan ba undang-undang Tanah Sarawak- ngaku Tanah Tembawai, Tanah Pendam & Tanah Temuda tu Tanah NCR…. tang secara physical sida tau enda ngaku tanah nya Tanah Tembawai, Tanah Pendam & Tanah Temuda). Nya alai bisi dua pekara ke mesti ditemu kitai ba senentang tu. A)Ke-satu: Ba Undang-Undang tau ngaku. lalu Ke-dua..secara physical tau enda ngaku. Ba kitai orang Asal...enti bansa Tanah NCR kitai enda diaku' ba undang-undang -reti ia ngemedis ke kitai laban kitai deka lenyau bansa Tanah NCR ke enda diaku' ba undang-undang nya.. Tang ukai naka nya aja -enti sema bansa Tanah NCR ke diaku' ba Undang-Undang “TANG” enda diaku' secara physical...nya pan sama ngemedis ke kitai..laban kitai mesti meri bukti ngayanka Tanah nya bansa Tanah NCR ke diaku' ba undang-undang. Enti sema kitai enda ulih meri bukti (kelebih agi ngena chara physical)..sebarang bansa Tanah NCR ke enda di aku' L&S tauka Perintah secara physical nya pan deka diempu Perintah…taja pan ba undang-undang Tanah bansa nya diaku' Perintah Tanah NCR.
Limpang mimit ngagai Pengawa Nyukat Section 6: Ba pengawa nyukat Perimeter Section 6 -dua bansa Tanah ke enda diaku' Perintah @ Tanah Pulau Galau (v) enggau Tanah Pemakai Menua-Kampung Asal (vi) –lalu diempu Perintah...ketegal ke enda diaku' perintah nyadi sebengkah Tanah NCR ba bup undang-undang Tanah Sarawak (tajapan enti nitih ke Common Law Tanah dua bansa tu sigi Tanah NCR). Tang ukai nya aja -ba pengawa nyukat Perimeter Survey Section 6 mega…L&S ngelaung ke Tanah Temuda ke enda diaku' Parti Politik GPS sebansa Tanah Temuda tauka dikumbai sida Tanah State Land. (Note: Enda nyadi ba semua menua-nya alai kitai mesti macha lalu nentu ke “Map Section 6 Land & Survey” nya amat betul nitih ke Pemakai Menua kitai dulu sebedau pengawa nyukat nya dipejalai-nya pan enti nyema kitai deka besetuju enggau sukat Section 6 nya ku aku). Ia ke bendar -utai ke suah udah nyadi..enti sema Tanah Temuda nya dikelaung...Tanah nya sigi udah dikeluar ke Lisin Provision Lease (PL). Aku enda nemu diatu tang enti lebuh pengawa sukat baru dipejalai ka baka maya-maya 2012...map perimeter Section 6 nya endang dilalai ari orang ke empu menua lalu pengawa nyukat nya pan dilalai ari orang ke empu menua mega. Baka kes kami di Kaki Wong...nyau deka abis menua disukat..nya baru bisi ngaga dialogue...nya pan semadi orang nyau deka ngaga report Polis pasal pengawa opis Land & Survey Betong. Diatu nama penyadi kitai -Tanah Pulau Galau, Tanah Pemakai Menua enggau Tanah Temuda @ ke enda diaku L&S secara physical..ke diluar sukat Perimeter Survey Section 6 –udah nyadi Tanah Perintah...lalu Tanah NCR @ Temuda ke didalam Sukat Perimeter Survey Section 6...pan nyadi status Tanah Perintah..seagi-agi' Tanah nya apin disukat ke siku-siku lalu diberi title Section 18. Aku mega enggai enda nyebut Title Section 18 tu pan siti hal. Enti Sukat Individu nya dipejalai ke ngena budget RM40 Juta/setaun beguna ke masa >100 taun. (enti nyema budget nyampau nya bisi belama tiap-tiap taun sampai 100 taun…tang enti nyema bisi nadai tauka bisi ngetu..lama agi ga baru bulih title Section 18). Retinya bisi meh Tanah NCR@Temuda dalam kandang Section 6 nya...jengap-jengap ba status Tanah Gunasama ke ngemai reti Tanah Perintah enti nitih ke Undang-Undang Tanah Sarawak sampai lebih 100 taun. Tanya ia-Tanah enggi sapa ke nganti ngelama nya?
Note: Semina bala YB & Menteri ke rauh-rauh madah ke Tanah Section 6 nya ukai Tanah Perintah...tang dalam reti Undang-Undang Tanah Sarawak..Tanah Section 6 nya sigi datai lalu enggi Perintah.pekara tu udah cukup nyemetak diterang ke Hakim ba kes Batu Bala V Zahara Mustapha' Lalu siti da concept ke mesti ditemu kitai – ianya jaku YB & jaku Menteri nya enda diguna Hakim ba Court. Jaku sida menteri nya enda ulih kena bekering ba Court laban jaku sida nya semina polisi aja. Hakim semina beguna lalu ngaga pemutus ngena jaku Undang-Undang Tanah Sarawak.
Dalam timpuh ke sama -sekumbang ke apin bisi title Section 18 – seribu satu macham utai tau nyadi ba Tanah Section 6 nya. Ambi ke chunto...Ba Court Case Nicholas Mujah ba Bukit Bediri di Sebangan. Tanah Gunasama tauka Tanah Section 6 ba menua sida ---> ditukar Perintah nyadi Forest Reserve selepas 40 taun (Perintah ulih nukar status laban status Tanah Section 6 nya endang status Tanah Perintah) ---->lalu enda lama udah nya Opis Forestry meri Lisin PL ngagai Company Hock Tong Hin Sawmill kena sida ngambi kayu balak (http://www.elaw.my/archive/MLRA202011.html) . Ari jangka aku...Pagila tauka lusa..sigi enda meh sida GPS tu ngachau Tanah Section 6 tu....tang enti udah bepuluh-taun...apin temu....kelebih agi enti sema kitai tu sama-sama bela ngetu bejaku ke issue Tanah NCR tu. Nya kebuah kitai enda tau ngetu bejaku ke issue Tanah. Ukai ketegal nadai utai bukai ke sama bela besai reti tauka beguna munyi ke jaku orang ngagai aku –tang ketegal enti kitai ngetu tauka badu…Perintah sigi mupuk ngereja ke Tanah kitai. Title Section 18 nya semina dalam langur aja…maya perintah PH..udah bekelikuh enggau Perintah Federal ketegal agih duit nya…apin nya baru dua taun….diatu kitai bejaku ke lebih 100 taun. Kelimpah ari nya – anang enda palik kiba-palik kanan mega kitai…peda lalu ingat ke berapa pemayuh langgur ke enda nyadi ke udah disebut Perintah GPS ba menua Sarawak tu? Bakanya mega…tau kinggat..asai aku enda banggat pedis dijangka....laban udah chukup mayuh bukti ke udah nyengenda sereta udah nyata nunjuk ke "penyai ati" enggau "penyai pengawa" Parti Politik GPS ba hal Tanah NCR tu. Jaku bala YB/Menteri GPS ke manah munyi sereta belemak didingga nya...ba aku siku...sigi enda ulih dikena sida ngelalai ke pengawa sida ba lebih 400 kes mahkamah ke benung pechara. Anang sekali-kali Bansa Dayak enda inggat ke fakta/fact lebih 400 iti tu.
Lalu ukai semina naka nya aja...dalam masa ti sama...sida PELITA/JV mega udah ready nganti deka ngambi kayu balak lalu ngereja ke Tanah NCR ke dalam kandang Sukat Perimeter Section 6…lebuh Pengulu/Tr & raban (golongan) elite ba menua nya udah setuju-kati chara orang ke deka ngadu pengawa kediri ba Tanah Temuda diri empu deka ngenan? Diatu -MANRED udah mupuk bejalai kena program ngemansang ke tanah NCR nya...enti nyema bekerjasama enggau Opis Pertanian..aku siku enda tentu bangat irau..laban naka pengawa sida Pertanian tu ia ke udah sigi ditemu enda nipu..semina pemendar sida ia mantu aja agi nyadi tanda tanya..amat bebendar tauka semina ngudah ke aja?. Tang mesti ingat…PELITA & Company JV pan sama mega dalam MANRED nya. Nya alai...enti enda betul agreement diadu ke antara orang asal enggau PELITA tauka Company JV…ambi ke chunto..nadai bisi wakil orang asal enggau sain (signatory) ba pengawa enggau duit keluar-masuk Company… pengujung project ke digaga nya pan sigi deka sama sebaka 2x5 enggau pengerugi kitai enggau project PELITA & JV ke udah nyengala nadai ngemai penguntung ngagai kitai orang Asal.
3) NAMA GUNA TANAH DALAM KANDANG PEMAKAI MENUA?
i)Tanah Temuda –tu Tanah ke udah diperimba –lalu kesuah agi tanah ke udah diperimba tu dikena kitai nyadi ke palan alai kitai Bumai-Betaun. Ba bup undang-undang Tanah Sarawak – Perintah sigi nerima Tanah ke bansa tu nyadi sebengkah bansa Tanah NCR…enggau syarat tanah nya mesti diperimba sebedau taun 1958. Tang suah udah nyadi..ba court-L&S tauka Perintah madah ke mayuh Tanah Temuda nya ukai diperimba sebedau taun 1958. Tu siti da penusah...laban ba Court kitai dipinta nunjuk ke bukti 'secara' physical ianya kitai amat udah berimba ke Tanah Temuda nya sebedau taun 1958. Ari segi cherita enggau oral kitai amat bisi mayuh bukti..tang bukti nya enda tentu diguna ba Court…bala Hakim meri berat agi bukti ngagai bukti physical. Tang bakani kitai deka nunjuk ke bukti secara physical...enti sema Tanah temuda nya udah diperimba sebedau 1958 nya…udah dipumai baru selepas taun 1958. Ba kes ke bakatu- kitai deka bulih pemedis deka meri bukti secara physical@ambi ke chunto baka umur kayu...laban semua bukti udah lenyau@kayu semua udah ditebang serta ditunu.. maya Tanah nya ke dipumai selepas taun 1958. Ambi ke cunto -semadi meh enti kitai bisi penemu macha utai ke nyadi ari sample tanah..nya baru kitai bisi bukti…tang aku ulih ke enda utai ke nyadi dalam masa bepuluh taun (selepas taun 1958)..nya ulih ditunjuk ke ngena sample Tanah? Aku enda nemu …nya alai ngarap ke kitai bansa ke bisi belajar ke penemu geology ulih mantu bala NGO enggau bala lawyer orang asal ba hal tu.
ii) Tanah Payung Temuda-kadang-kadang..taja amat jarang nyadi…kitai mega bisi ngalau sekeda Tanah antara Temuda siti enggau Temuda siti maya ke berimba. Kadang-kadang kebuah Tanah Payung Temuda tauka kayu ba kandang Tanah Payung Temuda tu bisi digalau kena ke kelai'..tauka kena belindung tauka ketegal bisi kayu ke rindu dipeda tauka bisi utai ke diguna ba Tanah nya. Enti baka enggi orang putih...sigi berupai amat peda aku…kitai ulih meda kayu agi tinggal ba antara tauka ba boundary Tanah sida ia...lalu kandang tanah ke alai sida betanam nya endang baka padang magang. Enti sema bisi Payung Temuda tu -nya bukti secara physical ke chukup manah...lalu ulih mantu nyadi ke bukti kitai maya pechara ba Court.
iii) Tanah Tembawai tu ianya Tanah ke udah dikena alai ngentak ke Rumah Panjai. Nyadi kebuah Tanah Tembawai tu besai reti-laban mayuh pun Buah bisi udah ditanam ba Tanah Tembawai. Nyadi kebuah mayuh macam Buah ditanam ba Tanah Tembawai laban kelia enda muntang deka nanam buah enti ia jauh ari rumah ke diwan kitai mensia. Kebuah ia laban mayuh utai tau ngachau-laban maya nya semua bansa jelu ke tau ngachau utai ke ditanam nya agi mayuh ba sebelah babas…ambi ke chunto...enti sema utai ke ditanam nya jauh ari pendiau kitai... kantuk buah ke utai ke ditanam nya…selalu ia abis diempa Rusa, abis dipakai Kijang lalu tambak utai tanam nya mega tau abis dikachau-dichabut bala kera, bala nyumbuh & etc. Tanah Tembawai tu nyamai ditan ba court...laban mayuh bukti secara physical bisi ba dia..kelebih baka pun buah ke ulih dikira umur.
iv) Tanah Pendam-alai numbak ke orang parai. Nitih ke Adat Kelia- kayu Asal enda tau dibunuh tauka ditebang ba Pendam Lama –nya alai L&S suah saru ngumbai Tanah Pendam nya Tanah Kampung Puang.. lebuh sida nentu ka bansa Tanah ngena Aerial Photo (limited years<10 years) sebedau 1958. Kitai ulih paham ke sida sigi tau saru enti semina ngandal ke Aerial Photo aja…tang dalam masa ti sama kitai pan nemu…Field Work sida Land & Survey nya enda dikereja…laban enti sema bisi dikereja…tentu ga orang ke empu menua ulih nunjuk enggau muntang ba dini alai Tanah Pendam sida ia. Enggau jaku pandak..enti sema L& S tau saru ke Tanah Pendam…nya reti ya L&S nya tau dipadah ke semina magi ke bansa Tanah nya ba atas mija opis sida aja.. sida nadai nurun ke Tanah. Tanah Pendam tu mega nyamai ditan ke ke ba court...laban mayuh bukti physical bisi ba tanah nya.
v) Tanah Pulau Galau –tu nama sekeda Tanah ke endang sengaja di galau tauka sengaja enda diperimba – laban bisi utai tumbuh ba Tanah nya...ke berega tauka beguna ba pengidup kitai kelia lalu sekeda nya beguna sampai ke diatu. Nama Pulau nya selalu ia digaga ngena nama utai ke bisi dia. Ambi ke chunto..enti sema Tanah nya enda diperimba ketegal bisi Rutan…nama ia digaga nyadi Pulau Rutan-Pulau Danan. Bakanya mega enti sema Tanah Pulau nya enda diperimba ketegal bisi maioh Kayu Nyatu'…nama Tanah nya dikumbai -Pulau Getah & etc. Nyadi selalu ia Pulau Galau tu enda banggat besai laban ia semina ngalau perengka ke bisi ba Tanah nya aja.
vi) Tanah Pemakai Menua tauka Tanah Kampung Puang – bisi bebida mimit ari Tanah Pulau Galau. Ba Adat tauka ba civilization kitai Bansa. Kitai mega bisi Adat tauka civilization tauka pemintar runding- ke sengaja ngalau sekeda rampa menua ke kadang-kadang dikumbai Kampung Puang lalu suah mega dikumbai Tanah Pemakai Menua. Retinya Tanah tu Kampung Puang dalam Kandang Pemakai Menua-nya alai ia mega suah disebut enggau muntang lalu dikumbai orang Tanah Pemakai Menua. Nya alai RETI Pemakai Menua tu bisi dua iti reti – a) Reti ke terubah nya – Kandang Menua (occupied territory) lalu b) Reti kedua nya – Kampung Puang dalam Kandang Pemakai Menua. Nyadi batang tuju ngalau Kampung Asal tauka Tanah Pemakai Menua tauka Kampung Puang tu ianya a) ke guna rebak ke dudi jemah ila lalu b) palan alai begiga ka semua perengka ke diguna nyengkaum pemakai babas, ubat & etc. lalu c) palan nyadi ke kandang jelu babas beranak-betelesak..ambi ke bisi alai orang ke empu menua nya ngasu-beburu ngulih ke jelu babas. Enti dibanding ke enggau pengidup kitai mensia kemaya hari tu... Tanah Pemakai Menua tu meh palan ke sama concept enggau SUPERMARKET tauka MEGA SHOPPING COMPLEX kitai ia ke diatu...laban semua utai ke diguna kitai kelia bisi ba Tanah Pemakai Menua nya. Pemintar runding tauka civilization bansa Orang Asal ke ngalau Kampung Puang tu enda nyelai...laban ukai semina semua mensia dalam Dunya tu..bisi penemu tauka pemintar ke bakanya...tang jelu babas mega bisi runding ke sama..ambi ke chunto baka jelu ringin chukup berupai bisi occupied teritory kediri..sama mega baka sida Ukui enggau sida Mayau ..lalu sama bakanya mega baka bala raban Ikan enggau sida Aki/jagu ke diau ba dalam Ai...semua bisi territory. Nya alai..enti semina Bansa kitai aja ke dipadah sereta digaga Parti Politik GPS nadai Adat Pemakai Menua tauka Occupied Territory...retinya penemu tauka pemintar runding tauka civilization kitai bansa nyau jauh kurang agi ari sida Ukui enggau sida Mayau ba mata Parti Politik GPS. Kati ku kitai Bansa..ke segenda-genda anak mensia ke bisi runding, bisi akal serta bisi pemintar kenyau ari Aki-Ini kitai kelia... tau setuju, tau puas ati serta tau ngetat ke diri-digaga Orang Politik nyau kurang agi ari pemintar jelu babas bakanya?
4) NAMA KEBUAH PEMAKAI MENUA BESAI RAMPA?
i) Batang pengidup orang kelia nadai lebih ari Bumai. Enti enda Bumai enda makai Asi. Lalu enti nadai bulih Padi – enda kaya, nadai reta, nadai tengkira. Tu utai ke amat nyadi ba batang pengidup orang kelia. Bilik ke bulih padi nya meh bilik ke bisi reta-bisi tengkira laban semua perengka Tembaga enggau Tajau ke bisi dipeda ba Rumah Panjai kelia tau dipadah ke semua datai ari asil Umai...kelimpah ari ia ke ulih ari pengawa Ngayau. Nya alai Umai enggai nyadi mit. Kelimpah ari nya-umai mega enggai nyadi mit laban mayuh Jelu & Indu Utai dalam babas ke tau ngachau…nya kebuah umai orang kelia ukai semina ba kaki bukit aja tang dua tiga iti bukit enggi sepintu. Lalu tu mega kebuah orang kelia sigi seruran Bumai bedandang-ambi ke umai nya besai sereta mayuh orang..lalu kurang agi dikachau jelu babas tauka indu utai. Suah kelia..orang ke empu umai ke ba tisi dandang – nadai bulih padi ketegal dikachau utai. Diatu uji kitai sama berunding – enti sepintu udah 2 iti bukit…enti bisi 30-60 pintu rumah panjai..berapa iti bukit nya?..bisi 60 ngagai 120 iti bukit! Lalu ke-dua...Padi bukit mega enda baka padi paya…asil padi bukit enda ngemayuh asil padi paya…nya mega kebuah Umai sepintu-sepintu ke nanam padi bukit jauh besai ari umai orang ke nanam padi ba paya. Ukai ketegal tentu sengaja deka beumai besai..tang utai ke nyadi maya nya ngasuh umai nya besai. Kelimpah ari nya…kelia mega nadai baja. Nya alai enti sekali udah bumai ba siti palan...enda kurang ari 7 ngagai 10 taun baru tanah ba palan ke sama ulih di pumai ke baru. Kebuah ia laban kayu ba Tanah ke baru dipumai ngambi pengelama 7-10 taun baru besai…tauka dikumbai kitai udah nyadi Pengerang. Nyadi kayu ke udah besai tu beguna laban baja padi maya nya.. bepanggai ba abu kayu ke ditunu. Enti kayu agi mit..selalu ia umai ba Tanah bukit enggai tentu nyadi. Diatu uji pikir baru-ketegal tu mega..reti ia abis nadai tiap-tiap pintu orang ba menua nya bisi Bumai ba enda kurang ari 7-10 iti palan Tanah…laban orang kelia mesti bumai tiap-tiap taun. Retinya enti setaun sepintu bisi berimba/bumai 2 iti bukit…dalam pengelama 7-10 taun..sepintu bilik nya deka bisi pemesai Tanah antara 14 ngagai 20 iti bukit. Kira ga enti bisi bepuluh-puluh taun tauka beratus taun orang asal udah ngidup ke diri ba menua nya. Tentu pemayuh tubuh enggau ruang bilik makin betambah.
ii) Orang kelia mega bisi nyimpan Tanah ke suah dikumbai Pulau…nitih ke utai ke diguna ke bisi ba Tanah nya. Selalu ia Pulau tu enda banggat besai…ia semina dipulau ketegal bisi utai diguna ba dia..ambi ke cunto baka Tanah ke bisi madang Bemban, baka Tanah ke bisi madang Rutan, baka tanah ke bisi madang Nyatu, baka tanah ke bisi madang Engkabang tauka baka tanah ke bisi maioh madang Pantu & etc. Nyadi semua utai tu tadi maioh guna ba pengidup Dayak jeman kelia..nya kebuah ia digalau.
iii) Tanah Kampung Puang tauka Tanah Pemakai Menua selalu ia sigi besai..laban Tanah ke bansa tu -endang sengaja digalau alai jelu bekandang lalu beranak-betelesak..ke ulih alai ngasu-beburu serta begiga ke semua utai tauka perengka babas ke diguna. Enti lebuh kitai bejaku ke kandang jelu ke nadai bepagar...kandang nya sigi enggai nyadi mit...laban Jelu sigi enda ngenat kediri ba siti alai lalu nemu ngiga pemakai serta nemu mindah, nemu lari. Nya alai -naka serekat pemesai Pemakai Menua tu meh -enti bisi orang menua bukai enggau betangkup ari sepiak-sepiak.
Note: Nitih ke Adat Pemakai Menua...Dayak enda tau begiga-ngasu beburu ba Tanah Pemakai Menua orang bukai. Ambi ke chunto..sampai saritu kami ari menua Drau ke berimbai enggau orang menua Mapar enda tau ngasu-beburu ngagai Menua Mapar enti nadai madah/minta pemendar tauka ngemai orang menua nya empu ngasu-beburu. Bakanya ga ba menua Babang-nadai orang menua bukai tau ngasu-beburu ba Kampung Puang tauka Tanah Pemakai Menua sida.
iv) Bakanya mega ari segi pendiau pengidup bansa orang asal kelia. Taja pan ba rebak aku empu –lebuh umur 7 taun..udah bejalai kediri dalam babas..ba pejalai lebih dua jam nengah babas. Anang ke ba rebak ke dulu agi ari nya. Pia mega lebuh a)Sekula nadai, b) Pasar nadai, c)Pangung Wayang nadai, d) Radio & TV nadai, e)computer nadai - nembiak sigi seruran bemain serta bejalai ke babas ngiga utai ke diempa diri empu maya agi mit@nadai keropok, nadai Ais Cream & nadai ruti gula. Lalu ba sekeda ruang bilik… lebuh umur nembiak nya udah mangai ba umur 9 taun …sekeda Apai-Indai mega udah belabuh ngandal ke anak sida...udah nemu begiga ke utai pakai ke ulih dibai ke rumah nyadi ke lauk..ambi ke chunto-begiga ke tekuyung, begiga ke macam bansa kulat, nginti ba sungai ke mit & etc. Enti sida ke udah Tuai tauka udah besai agi..tentu jauh agi ga pejalai sida begiga ke utai dalam babas.
5) NAMA BUKTI TANAH NYA AMAT TANAH PEMAKAI MENUA ORANG MENUA NYA?
Kandang Pemakai Menua (garis antara menua) sigi ditemu antara menua siti enggau menua siti. (Note: Ambi ke chunto ba Menua Bagi-Kedua Garis Antara Menua tu sigi udah masuk dalam map Land & Survey. Tang aku ningga baru-baru tu Garis Pemakai Menua tu udah nadai agi-tau peresa..aku lalu apin meresa. Lalu Tanah Kampung Puang tauka Tanah Pemakai Menua ke bisi dalam kandang Pemakai Menua nya sigi amat nadai kala diperimba. Kebuah ia laban Kampung Puang nya endang digalau alai begiga serta alai ngasu-beburu..
Nya alai-tanya ya,..nama bukti Tanah Kampung Puang nya amat diempu siti-siti menua nya? Ba penemu aku-udah cukup terang;
i) Orang ke betangkup Menua sama bela nemu Garis Antara Menua enggau pangan diri lalu bebasa sereta nitih ka Adat enggau enda sepeneka masuk tauka begiga ba Pemakai Menua Orang bukai.
ii) Orang ke empu menua nya ke –ngaga nama bukit lalu orang menua nya nemu nama bukit ke sama, ngaga nama lebak lalu orang menua nya nemu nama lebak ke sama, ngaga nama Sungai lalu orang menua nya nemu nama Sungai ke sama. Orang ke empu menua nya mega nemu dini alai kayu, dini alai Buah, dini alai madang bemban, dini alai Madang Rutan nyengkaum semua perengka ke beguna. Sida mega ngaga lalu orang menua nya sama sampal nemu anak Sungai, dini alai Lubok, dini alai Lansar, dini alai Kerangan semua ditemu magang. Pengabis ia-dini alai menua ke bisi Antu pan ditemu orang asal. Palan alai jelu dia, palan alai jelu ngulih ke garam ba Apan tauka palan alai jelu Melangkan serta dini alai jelan ke suah ditengah jelu ba dalam Kandang Pemakai menua nya pan ditemu magang. Ba aku-tu nunjuk ke orangka ngambu kandang Pemakai Menua nya ukai semina ngambu Tanah Pemakai Menua nya pia aja, lalu ukai semina main tunjuk enggau tunjuk jari aja…tang sida ia sigi amat-amat ngena sereta beguna ke Tanah Pemakai Menua nya.
iii)Mayuh bukti udah nunjuk ke civilization Bansa Dayak endang ia amat bisi udah ngembuan Adat Pemakai Menua-ke sigi amat bisi, sigi amat dikena lalu sigi amat di basa ulih bansa Dayak -kelebih agi sida ke berimbai menua serta besatup garis Pemakai Menua -sampai ke saritu. Utai tu.bisi disebut ba Kes Nor Anak Nyawai (HC), Kes Tr. Sandah (FC), Webinar on ‘Reflections on Director of Forest, Sarawak v TR Sandah ak Tabau’ & etc.
6) NAMA GUNA ADAT PEMAKAI MENUA BA COURT?
Enti Adat Pemakai Menua tu diterima Undang-Undang ke digaga bala raban YB ba Dewan Undangan Negeri…Adat tu besai amat empa. Adat Pemakai Menua tu “ULIH DIKENA NGENAN KE SEMUA BANSA TANAH NCR KE NADAI TITLE”. Nama kebuah? Laban bukti ke dikena nunjuk ke Tanah Adat Pemakai Menua tu enda jauh muntang. Asal kitai ulih nunjuk ke pengawa kitrai ba dalam kandang Pemakai menua nya , jalai kaki kitai nurun ngasu-beburu, Tembawai Lama serta Pendam…nya udah cukup kuat. Nya alai Adat Pemakai Menua tu cukup muntang enti dikena ngenan ke Tanah Temuda ke nadai bukti physical baka ke dipinta bala Hakim.
Lalu Adat tu enda ulih dilaban Perintah ba Court…nya kebuah Orang Asal bisi udah menang lebih 30 kali ari High Court sampai ngagai Federal Court@kes Madeli Bin Saleh [2008] 2 MLJ 677 (2).. Reti ya...enti Adat Pemakai Menua ke Asal tu diterima Undang-Undang…GPS/Company ..sigi enda agi muntang orang ke deka ngambu tauka deka ngambi Tanah NCR ke nadai Title.
Tang cukup sayau...rata-rata kitai bansa asal enda meda serta enda nemu guna Adat tu....kelebih agi sida ke bisi pelajar tang kurang macha issue Tanah NCR enggau sida ke kelalu balat bepolitik@ke nyau sampai ba tahap enda ulih meda utai ke nyadi kiba-kanan...mayuh kitai semina ngumbai Adat Pemakai Menua tu semina ulih dikena ngenan ke Tanah Pulau Galau enggau Pemakai Menua aja. Nya alai-laban ke ngumbai diri nadai Tanah Pulau Galau enggau Pemakai Menua@Kampung Asal..kitai muntang endar madah ke Adat Pemakai Menua tu nadai guna. Lalu ketegal nya kitai lalu enggai kiruh sekali-kali. Tang enti sida tu udah bisi charut ketegal Tanah Temuda sida enda diaku Perintah ila...nya baru sida ia nemu pemedis deka ngiga bukti physical lalu sida gerenti deka nemu lalu sida tu deka chukup nesal laban Adat Pemakai Menua ke chukup bisa dikena ngenan ke semua bansa Tanah NCR ba court..udah enda dikibuh ke diri empu.
Note:Hakim ngaga pemutus ba court nitih ke "argument enggau Undang-Undang Tanah"...ba kes Tr. Sandah tu Court/Hakim ukai ngaga pemutus kediri..tang ari ketegal pengawa Peguam Negeri ke mati-idup madah ke Adat Pemakai Menua nadai kala bisi dikena ba menua Sarawak lalu Adat nya mega nadai kala diterima sebarang Perintah ke kala megai menua Sarawak. Penemu Penguam Besar Negeri Sarawak tu meh nyadi ke "pun-tauka pengemun" chara serta ngujung ke pengawa Hakim ke lalu ngaga pemutus -madah ke Adat Pemakai Menua nya nadai kuasa Undang-Undang.
7) NAMA PEMEDIS PERINTAH LABAN ADAT PEMAKAI MENUA?
i) Enti sema Adat Pemakai Menua ke Asal tu enda punas...Adat Pemakai Menua tu ulih dikena ngenan ke semua bansa Tanah NCR ke nadai title ba Court. Enti sema utai tu nyadi –iya tau bendar ngujung ke langgur pengawa ngeluar ka Lisin PL, Pengawa Balak enggau pengawa Ladang JV/PELITA ke nitih ke polisi Perintah GPS ia ke diatu –nyadi puntan tauka nyau enda ulih dikereja agi. Enti utai tu nyadi –jalai bala raban parti politik ke dikena sida ngiga pengaya enggau jampat - nyau tutup. Enti nadai pengawa Balak serta nadai pengawa ladang...dia Parti Politik GPS deka napi pemedis laban nadai penatai belanja duit ari bala towkey balak tauka towkey ladang. Enti nadai duit ke mayuh..dia Parti Politik GPS deka enda tentu ulih melanja kitai makai-ngirup maya semak Pengawa Bepilih (election)...enti nadai utai nya sida muntang agi deka alah.
ii) Adat Pemakai Menua tu mega ulih disalah guna ke orang asal. Sigi amat bisi beberapa kes Orang Asal ngena Adat Pemakai Menua “ngambu tauka ngambi” Tanah Perintah…tang kes ke bakanya nadai mayuh. Ari lebih 400 iti kes ke benung pechara ba court...kes ke bakanya enda datai 5% lalu udah terbukti ulih menang ba court.
Tang enda kurang ari 95% ari semua > 400 kes ke benung pechara nya ...Perintah meh ke amat segenda-genda “ngambu serta ngambi” Tanah Orang Asal. Nya alai –alasan sida ke majak belandik ke propaganda ke madah ke Bansa Orang Asal - “bam, amu serta rangka” lalu mayuh ngambu Tanah ba menua tu nya-sigi semina ke “tegal” Perintah aja. Ia ke amat-amat…penanggul tu datai ari polisi Lisin PL Balak enggau Ladang GPS. Laban udah cukup terang (ukai semina berita aja- tang nyata…ambi ke chunto ari "Inside Malaysia's shadow state – a film from Global Witness". Lalu ba aku empu…siku Menteri kitai Iban udah terang-terang ngaku bisi ampit pengawa nya. lalu chara sida bulih mayuh duit ari Lisin PL nya mega udah ditemu. Sida semina ngulih ke Lisin PL enggau chara mayar “premium” ke murah ngagai Perintah...tang udah nya sida lalu nyual Tanah Lisin PL ke sama nya enggau rega ke berega ngagai Company developers. Ni enda sekelip mata bulih mayuh untung. Nya alai tu meh chara golongan elite/politik enggau kroni sida ia bulih duit ke mayuh enggau muntang lalu ulih nyadi kaya enggau jampat ba Menua Sarawak. Minta ampun...ba aku siku...aku nadai lalu ukai kepapas ke sida ia kaya-raya ketegal ngereja pengawa ke bakanya....nasib sida meh...tang kerja pengawa ke bakanya nya semina ba Tanah ke amat-amat diempu Perintah aja. Anang ngereja pengawa ke bakanya ba Tanah NCR. Lalu enti ngereja pengawa bakanya ba atas Tanah NCR kitai…kati ku kitai enda angkat ngenan sereta ngering ke diri? Retinya mantah pengawa Lisin PL nya ukai ketegal kepapas…tang ketegal enggai meda Bansa diri dikemeli ke Perintah enda beriga-iga bakanya.
8.KATI CHARA ORANG MUNUH ADAT PEMAKAI MENUA?
Cara GPS munas ke Adat Pemakai Menua
i) AJAN diberi tugas nentu ka Adat Pemakai Menua enda tau ditulis ba bup Adat Iban 1993. Nya ngujung ke Nicholas Bawin kena buai ari ke megai pengawa Timbalan Ketua ba opis Adat Istiadat dalam taun 2004…laban ia ke deka nulis Adat Pemakai Menua tu ba Adat Iban 1993.
ii) Tiap-kali pechara ba court –GPS enggau nyemetak sereta enda ngetu madah ke Adat nya –a)Nadai kala wujud ba Bansa Dayak, lalu b) Nadai kala diterima sebarang Perintah tauka sebarang Undang-Undang ba menua Sarawak nyengkaum Adat Iban 1993.Note: Kala ke benung ingat…uji peresa Adat Bidayuh Order, 1994 & Adet Kayan-Kenyah, Adat Lun Bawang, Adat Bisaya, Adet Kelabit dan Adet Penan –bisi enda kini nyebut Adat Pemakai Menua? Enti sema ya bisi…asai aku tau sida ngelaban ba court. Lak ke Bansa Iban aja ga Bansa Dayak ke nadai Adat Pemakai Menua... tang bansa Dayak ke bukai nya bisi.
iii) Ngapil sampai ngagai Federal Court –laban ba federal Court bejaku ke reti Undang-Undang. Perintah GPS nemu diri enda tan enti belaban ke bukti enggau orang asal. Laban kitai cukup bukti dikena nunjuk ke Tanah Pemakai Menua nya endang amat enggi kitai. Enggau cara ngapil sampai ngagai federal Court –Perintah GPS mega nemu diri ulih ngambi peluang ba “MAJORITY DECISION”. Reti majority decision tu ianya…ni bagi pemutus ke majority ari 5 iku Hakim Federal Court. Sida ya nemu..Hakim ari Malaya-kelebih agi Hakim ke nadai kala diau/bekerja di Sarawak..sigi enda nemu guna, enda nemu reti lalu enda nemu pemesai reti Adat Pemakai Menua ba pendiau pengidup Orang Asal.
Note: Orang Asal alah ba kes Tr. Sandah nya -ukai ketegal bala sida Baru Bian enda ulih mantai ke bukti…lalu ukai mega ketegal bukti nya enda diterima Hakim…Tang ketegal pemayuh Hakim ke nerima Adat Pemakai Menua nya mimit agi ari pemayuh Hakim ke enda ulih mereti lalu enda ulih nerima Adat serta pemesai reti Adat Pemakai Menua nya ba pengidup kitai Bansa.
iv) Udah bekau ke mujur munas ke Adat Pemakai Menua. Dia GPS lalu beguai-guai kimpin lalu “mangai” tauka “nyui” ke Pemutus Adat Pemakai Menua nya punas -ukai ari ketegal pengawa sida GPS….tang datai ari ketegal Pemutus Mahkamah. Reti ya ukai ketegal hal politik lah ku jaku sida ia…pemutus nya sigi digaga Hakim ke bejalai ke pengawa ke lurus serta nadai bepolitik. Tang ia ke bendar –ba orang ke nemu utai ke nyadi ba dalam Mahkamah…baka bala Lawyers enggau bala NGO...sida tu sigi nemu pengawa munas ke Adat Pemakai Menua nya endang pengawa ke “diatur sereta dikereja” sida GPS empu. Laban Pemutus majority bala Hakim ke ngaga pemutus madah ke Adat Pemakai Menua nya “Nadai Kuasa Ba Undang-Undang”-sigi datai, endang bepun sereta nyengala berindik ari Penemu Peguam Negeri Sarawak (Raban sida JC Fong) maya nya ke madahka –“Adat Pemakai Menua –nadai kala bisi nyadi, nadai kala bisi dikena lalu nadai kala diterima sebarang Perintah ke kala Megai Menua Sarawak”—TU MEH JAKU LALU TU MEH AGENDA GPS!!!
Lama sida GPS udah ngatur chara ke ulih dikena munas ke Adat Pemakai Menua tu...lebih 30 taun JC Fong betachah enggau Lawyers Orang Asal ba Court…ambi ke pengawa sida ia nya ..enda tak nyengala berupai lalu enda ditemu rakyat mayuh.
Note: Pemutus Hakim ba Kes Tr. Sandah tu mega balat amat nyadi controversy -.
i) Naka ke udah, Pemutus Majority Hakim ba kes Tr. Sandah tu seruran nyadi ke “buah mulut”, “buah kenang” ke enda engkeman enti di banding..ke enggau penemu mayuh orang ke landik pasal undang-undang baka review ke bisi dibantai sida- Abdul Fareed Gafoor-President of the Malaysian Bar Council, Associate Prof. Dr Ramy Bulan, Research Fellow, Director, Centre For Legal Pluralism and Indigenous Law, Faculty of Law, University of Malaya, Dato’ Dr. Gurdial Singh Nijar, Former Law Professor, University of Malaya, President of the National Human Rights Society (HAKAM), Tan Sri Dato Seri Panglima Richard Malanjum, Former Federal Court Judge and Chief Justice of Malaysia enggau mayuh agi…kelimpah ari Dissenting Judgement ke bisi digaga YA Tan Sri Datuk Zainun binti Ali. Federal Court Judge, Tan Sri David Wong( Chief Justice of Sabah & Sarawak) at the Review 11 Sep 2019 enggau mayuh Pemutus bala Hakim ke bukai. Lalu naka ia ke ditemu aku…nadai siku udah bisi orang ke landik pasal undang-undang bisi nyukung pemutus majority Hakim ba kes Tr. Sandah nya secara formal, tauka ba journals, conference &etc. Semina bala lawyers Bansa Dayak empu ke Pro-GPS nya aja…ke bisi didinga muji Pemutus Hakim ba Kes tr. Sandah. Tang sida semina bisi dipeda bemunyi ngenang kes tu secara enda formal ba sebelah WAG (ba FB enggai sida bejaku…nyangka nyau nemu malu-enggaika ditachak bala NGO)…lalu utai ke nyengala nya sida “LAWYERS DAYAK GPS” nya enda meh berani becherita ke enggau silik pasal kes Tr. Sandah tu…sida semina berani nyebut “END RESULTS” ia aja-“NO FORCE OF LAW”…. lalu semina berani nyui ke “PEMUTUS NYA NGAGAI–PEMUTUS KE MUKTAMAT ARI COURT”. Nemu kita nama kebuah? Kebuah ia meh laban nya meh chara sida ngelipak ke rakyat mayuh ari ke nemu cherita ke amat nyadi ba court…ianya pemutus ba kes Tr. Sandah nya semina ketegal alah laban “Majority Decision” lalu ukai alah ketegal “Pengamat tauka Pemula”... Adat Pemakai Menua nya amat bisi, lalu dikena sereta dibasa orang Asal sampai ke saritu. (ke diterima Undang-Undang Common Law). Note: Tang ba hal tu kitai bisi penanggul ke chukup besai ba peda mata aku...laban kitai bansa agi kelalu mayuh... manggai ke pengandal tauka pengarap -semina ngagai orang ke bisi pemandai, orang ke educated tauka orang ke nemu pasal Undang-undang Tanah nya aja. Nya alai aku enggai enda nyebut...pengawa ke ngandal ke orang pandai aja mutar ke penanggul Tanah NCR nya “chukup salah”…laban orang ke pandai, orang ke educated serta orang ke nemu Undang-Undang nya “semina ulih bejurai sereta madah ke ni bagi utai ke engkeman aja”...uji peda ila...Kes Tr. Sandah sigi tetap seruran dikejaku ke Orang ke ngembuan penemu Undang-Undang...baik nya ba University tauka ba Forum, Conference & etc nyentuk ke bepuluh-puluh taun tauka beratus-ratus taun ari diatu -selagi pemutus nya enda engkeman ba mata orang ke nemu reti undang-undang. Tang kitai mesti nemu....sida ke pandai nya “enda ulih nulung lebih agi ari nya”. Kitai empu mesti ngereja pengawa -lalu ba penemu aku ...kena mereti ke penusah tanah tu...enda tentu beguna ke pemandai iga...asal kitai sanggup deka nemu penerang ari sepiak-sepiak..kitai sigi nemu kuing ia...lalu enti kitai bisi ngembuan runding ke nadai beleman deka besaup ngering ke interest bansa diri...kitai sigi udah ulih ngereja pengawa ke ulih mantu ngidup ke Adat Pemakai Menua tu. Nadai Perintah berani...enti bisi bepuluh tauka beratus ribu kitai Dayak sama-sama meri pressure. Tang enti sema ke semina bisi seratus-dua aja meri pressure...sigi nadai ngasuh sida ya nangi meh nya...sigi agi rising-rising bala YB/Menteri & towkey GPS.
ii) Pemutus Hakim ba kes Tr. Sandah tu mega dipeda –enda ngira -Fundamental common law principles) ke udah diterima ulih Federal Court ba kes Madeli Bin Saleh [2008] 2 MLJ 677 (2..ke madah ka--”Presumption of continued legal enforceability of pre-existing customs unless they are taken away by plain and obvious words in legislation” -The Federal Court in Madeli bin Salleh held that the proposition of law in the cases of Mabo and Calder “reflected the common law position with regard to native titles throughout the Commonwealth. Retinya Adat ke udah dikena dulu agi ari Undang-Undang baka Adat Pemakai Menua -semina ulih dibuai enti bisi ditulis enggau terang sereta nyengala dibuai ba Bup Undang-Undang. Tang maya kes Tr.Sandah…nadai bisi leka jaku ba Undang-Undang Tanah Sarawak bisi nyebut Adat Pemakai Menua nya dibuai/nadai reti tauka nadai force of law.
iii) Pemutus chara tu semina digaga setaun udah abis pechara ba Federal Court. Ngujung ke pemutus tu digaga lebuh maya siku ari lima iku Judge Federal Court nya nyau pincin(retired)-lalu pemutus Federal Court nya semina digaga 4 iku Hakim aja.
9) NAMA RETI ADAT PEMAKAI MENUA KE BARU –KE DIGAGA PERINTAH GPS KE DIKUMBAI SIDA SECTION 6A?
Adat Pemakai Menua ke baru digaga GPS ke dikena nganti Adat Pemakai Menua ke Asal nya-dikumbai sida Tanah NTD tauka Section 6A..
Enti kitai berunding ke utai ke udah nyadi, lebuh udah lebih ari 30 taun GPS madah ke Adat Pemakai Menua nya nadai bisi kala dikena ba menua Sarawak ba dalam court.. Tang lebuh udah mujur munas ke Adat Pemakai Menua ke asal nya sida lalu beguai-guai pansut enggau Adat Pemakai Menua ke baru@NTD@Section 6A?
Patut kitai nanya diri empu…Nama kebuah bakanya? Ari ni penatai Adat NTD@Section 6 sida nya?
Note: Siti concept ke mayuh enda ditemu kitai ianya pasal-“tanggung pengawa Perintah ke betul dalam Dunya tu”-ianya sigi patut meri kuasa Undang-undang ngagai Adat ke dulu agi ari Perintah..enti sema Adat nya nadai ngerusak menua enggau nanggul pemaik menua. Enti sema baka Adat Ngayau...nya sigi patut dibuai laban ia ngerusak pemaik menua. Tang Adat Pemakai menua tu udah turun-menurun terbukti ngemai pemaik (dibasa) dalam community orang asal. Nadai kebuah patut dibuai.
Nama kebuah Perintah mesti meri kuasa undang-undang ngagai Adat ke dulu agi ari Perintah?
Laban enti perintah “enda meri kuasa undang-undang” ngagai Adat ke engkeman ke udah dulu ari perintah sereta agi dikena lalu agi dibasa orang asal ba menua nya...dia perintah ke bakanya ba menua nya tau ngaga penyarut. Nya kebuah Perintah Brunei, Perintah Brooke tauka Perintah Jipun enda negu Adat orang Asal. Utai tu sigi selalu nyadi ba Sejarah Dunya. Tang enti sema ke enda nyadi ke penyarut...nya nyangka semina nyadi ba bansa Dayak aja..laban kitai kelalu mayuh apin nemu reti kuing hal tu. Ketebal agi laban kitai bansa agi kelalu mayuh...semina deka ninga ke jaku YB & jaku Menteri aja enggau enda betimbang ke pemanah enggau penyai sereta enda bekira ke pemula enggau pemetul jaku sida ia ari ke meda utai ke udah nyadi ba depan mata. Ambi ke chunto...udah nyengala bala YB/Menteri kaya-raya ari asil nyual Tanah nyengkaum Tanah NCR..atas nama Lisin PL...kati ku fakta tu tau enda dikira kitai lebuh kitai ninga ke jaku sida???
Perintah ke muai Adat ke dulu agi ari Perintah nya tanda ia Perintah nya 'membuli' kitai lalu enda patut diguna kitai.
Lalu chukup terang ba kes Perintah GPS tu.. sida ia "ngaga" lalu semina “meri kuasa undang-undang” ngagai Adat Pemakai Menua@Section 6A ke “digaga” sida ke kitai aja. Sida ukai meri kuasa undang-undang ngagai Adat Pemakai Menua kitai ke amat tauka asal. Nya alai enti "utai gaga" orang ke kitai…kitai patut deka nemu nama pemanah enggau penyai Adat nya?
10) NAMA PENYAI TAUKA PENGERUGI KITAI LABAN UNDANG-UNDANG SECTION 6A NYA?
Sekeda ari reti lalu kelebih agi pengurang tauka pengerugi kitai Orang Asal ke datai ari Undang-Undang Baru nya ianya-
i)Semua Tanah Pemakai Menua kitai enda tau bisi ba atas Tanah ke sama enggau “Tanah Lisin PL” ke udah dikeluar ka sebedau 01 Aug 2019. Ba Undang-Undang retinya nya “Tanah Lisin PL” nya nyau digaga Perintah GPS “dulu agi ‘ada” lalu “besai agi Hak’ ari “Tanah Pemakai Menua” ke lama udah diwan, udah dikena sereta udah diempu (Occupied Territory Aki-Ini kitai beratus taun ke udah dulu agi ari Perintah). Pengawa Perintah GPS tu chukup enda masuk akal ari segi Undang-Undang. Lalu utai ke enda masuk akal tu semina muntang dikereja ba Bansa Dayak laban Bansa nya kelalu balat bepechah, nadai hala-tuju ngagai Bansa diri, enggai kiruh lalu enda nemu kuing enggau pangka utai ke nyadi tauka deka nyadi jemah ila.
Note: Ba hal tu kitai mesti ingat ke dua iti perkara-
a) GPS bisi masa setaun-enggai…alai sida mikir sereta nentu ke dini alai sida ngeluar ke Lisin PL sebedau 01 Aug 2019. Laban Undang NTD@Section 6 diluluska kena Jul 2018…tang semina dipejalai ka belabuh ari 01 Aug 2019. Dini alai Tanah Lisin PL ke udah dikeluar ke Perintah PL nya? Kelimpah ari List Lisin PL ke bisi ditemu ari (2004 -2010) ke bisi 969 iti…kitai enda nemu. Retinya kitai rakyat biasa enda nemu.. Berapa Penyampau?... lalu kelebih agi-Dini Alai?... Lisin Tanah PL ke udah dikeluar ke ari Taun 2011 ngagai 01 Aug 2019?
ii) Pemesai Tanah NCR ke dikumbai sida Pemakai Menua ke nyengkaum Pulau Galau nya diletak ba taka pemesai 500 hectares...lalu enda tau besai agi ari 1000 hectares. Semua Tanah ke besai agi ari nya deka diempu Perintah magang. Bisi dua pekara ke mesti ditemu kitai ba hal tu- Ke-satu: Tanah ke dikumbai Pemakai Menua nya mesti nitih ke "definition" ari Land & Survey(GPS). Ba pun tadi aku bisi udah nyebut...sida Land & Survey tu udah suah amat ditemu madah ke Tanah Temuda nya pan tau dikumbai sida ia Tanah Pemakai Menua. Reti nya-orang asal anang guai tak gaga-gaga serta lantang ati ngandal ke Tanah ke dikumbai sida ia Tanah Pemakai Menua nya -sama mega Tanah ke dikumbai Land & Survey Tanah Pemakai Menua. Laban Tanah ke dikumbai Land & Survey Tanah Pemakai Menua tau jauh besai agi -laban ia tau nyerangkung Tanah Temuda Orang Asal. Sida tau enda nurun meresa ngagai tanah...tang semina ngelukis ba map aja..lebuh maya sida ke ngeluar ke Lisin PL. Kedua-Jaku orang ke madah tiap-tiap Rumah Panjai deka bulih pemesai Tanah Pemakai Menua 1000 hectares. Nya enda betul. TU semina jaku bala YB PRS kena ngemintar ke diri ari luar DUN lebuh undang-undang baru Section 6A nya digaga maya Jul 2018. Maya Roadshow-Peguam Besar Negeri Sarawak terang-terang madah ke anggapan tu enda betul. Diatu enti kitai ngena analogy Nengeri...uji ga tanya Sultan Pahang enti ia ulih setuju ke menua Pahang dikurang ke pemesai sama baka pemesai menua Malaka?...Bakanya ga menua Cina...tau uji ga ngurang ke pemesai menua sida sama pemesai enggau menua Singapore...enti sida ulih setuju? Tang enti nyema..ambi ke banding ba menua Menua Amerika...enti sema semua penyukong Parti republican setuju tauka enggai ngambi kiruh ka menua diri empu mit ketegal pengawa politik...lalu semina penyukong Parti Democrat aja enda besetuju...aku gerenti menua Amerika pan ulih nyadi mit. Laban nya meh utai ke nyadi ba Bansa kitai Dayak ba menua Sarawak....ketegal Parti Politik tauka ketegal pengawa Parti Politik..maioh kitai nyau enda berasai munuh Adat enggau Hak bansa diriempu. Nya kebuah Parti Politik GPS muntang amat ngereja pengawa bakatu.
iii) Ngena ubah ubah undang-undang Section 6A nya. Kuasa nentu ke ni bagi Tanah Pemakai Menua udah dipindah ke ari Hakim -ke beguna ke bukti ba Court ..ngagai Land & Survey sereta Menteri. Ba hal tu kitai orang asal chukup rugi...laban enti sema Adat Pemakai Menua ke asal nya diterima ulih undang-undang (sekali agi aku enggai enda nyebut-"diterima ba undang-undang" tu reti ia diterima bala YB ba DUN)..kitai nadai penanggul sekali-kali ngenan ke semua bansa Tanah NCR kitai ke nadai title...nyengkaum Tanah Pemakai Menua. Tang diatu -cerita udah tebalit....Land & Survey enggau Menteri nya ke ngeluar ke Tanah Lisin PL ke udah terbukti suah ngerengkap Tanah NCR kitai...lalu sida ia nya ga ke "berkuasa" nentu ke bisi tauka nadai enggau natak berapa pemesai Tanah Pemakai Menua kitai. Kitai Orang Asal nyau baka minta bagi Jelu Ringgin anak ikan tauka sebaka baka ke minta Buah Pisang ari raban bala Kera.
Note: Berita ke pemadu baru ke bisi udah dishare orang ianya...Tanah Pemakai Menua sida ke dipinta sida ari Perintah GPS..semina diberi palan alai ngaga rumah panjai atas status Tanah Rizab Kerajaan di bawah Section 7 Kanun Tanah Negeri. Nya..nama penyadi kitai bakatu?
iv) Pemendar ke deka diberi ngagai orang ke minta Tanah Section 6A nya -Nadai timpuh. Reti nya kitai ulih ngisi form lalu minta Tanah Pemakai Menua@Section 6A nya bila-bila masa enggau berapa penyuah form ti deka dianjung...tang Land & Survey enggau Menteri nadai tatak pengelama deka nentu ke peminta nya bulih tauka enda. Sebarang ku sida meh.
v) Penanggul Tanah NCR tu nyau nyadi besai ukai ketegal pengawa ari kitai bansa ke ngering serta ngena...enda..agi maioh bekuruh kitai bansa ba hal tu.....tang penusah Tanah NCR tu nyau nyadi besai laban ketegal pemayuh kes pechara ke >400 kes nya udah datai sereta ditemu dunya luar. Dunya luar udah belabuh bisi meri pengirau lebuh maya kes Tanah NCR tu baru manggai >100 iti kes sebedau taun 2010. Berindik ari utai ke nyadi nya..perintah lalu bisi kena tekan. Lalu ngujung ke -a) Penanggul Tanah NCR tu bisi masuk program NKRA tang proposal NKRA dipusin sereta dibelit Perintah GPS lalu pansut enggau Pengawa Nyukat Perimeter Section 6 dalam Taun 2010. Lalu sebedau Jul 2018 ketegal pressure ari pengawa politik -Perintah GPS madah ke diri deka ngaga Undang-Undang ke ulih mutar ke "semua penanggul Tanah NCR". Tang udah Jul 2018 nya baru kitai nemu...Ubah Undang-Undang ke digaga GPS tu lansung nadai nulung mutar ke penanggul >400 kes ke benung pechara. Tang nyau tebalit...ubah undang-undang ke digaga sida nya nyau ngasuh semua kes ke bekait enggau Pemakai Menua nya alah pechara ba court. Sigi amat..sebarang Parti Politik ke megai Perintah sigi bisi kuasa ngaga undang-undang (ngena kuasa 2/3 pemayuh YB ba DUN) ke lalu nyadi ke undang-undang menua. Tang tanya ia diatu -ulih ke enda orang asal ke ngempu kes >400 iti nya nerima...nama penyadi menua sida ia?,,,nama penyadi pengidup sida ia? Enti kitai meda History ba Dunya...undang-undang ke enda betul taja pan legal...sigi enda kala ngaga pemaik....tang sigi nyengala ngaga penyarut!...kemaya enggau dini alai aja apin ditemu..
11) KATI CHARA KITAI ULIH NGIDUP KA ADAT PEMAKAI MENUA & PULAU GALAU?
Aku sigi setuju..ngena cara Politik..sama ada political pressure tauka political change ianya chara ke pemadu engkeman sereta chara ke pemadu muntang dikena ngidup ke Adat Pemakai Menua tu baru. Kebuah ia laban penanggul tauka penusah Adat Pemakai Menua tu endang ia 100% datai ari runding sereta datai ari Pengawa Parti Politik GPS. Ukai nasib tang endang utai ke nyadi digaga mensia ari Parti Politik GPS. Tang aku enda bejaku ke hal nya sekalitu.
Nya alai ba penemu aku-siti ari chara kitai move forward dalam jangka masa ke panjai ianya-
i) Semua Dayak-enggau enda ngira Agama, parti politik enggau Menua -mesti nemu reti sereta hak diri pasal Pemakai Menua & Pulau Galau.
2) Semua Dayak -enggau enda ngira tuai-biak, bujang-dara mesti nemu lalu belabuh bejaku (word of mouth) ngerembai ke reti Pemakai Menua & Pulau Galau ba pengidup asal Bansa Orang Asal ngagai anak-telesak, diri sebilik, kaban-belayan, diri serumah enggau diri semua.
3) Semua Dayak -mega patut ngambi peluang bekunsi ke reti Pemakai Menua ngagai bansa orang lebuh ke bisi awak. Ambi ke chunto..lebuh maya bepekit Kumang...bala Kumang mega ukai patut semina ngayan ke pemanah Ngepan...tang mega ulih nusui cherita pasal ngepan enggau kait ia ngagai Pemakai Menua. Ambi ke cunto -nemu cerita penatai rengat enggau urat penawar landak ke dikena nge-chok kain datai ari Pemakai Menua. Bakanya ga bala lelaki ke bekena ke ngepan-patut nemu cerita perengka ngepan sida mega datai ari Pemakai menua & etc.
4) Lalu ia ke pemadu manah -kitai patut bisi sama baka orang bisi awak bekungsi ke guna Pemakai Menua aba Pendiau-Pengidup kitai - ke ulih dipeda sereta ditemu orang bukai di seluruh Malaysia -baka FB, youtube, TV lalu kitai mega bisi Drama, Lagu, Movie, Documentary, Expo & etc.
AMBI KE SEMUA KITAI NEMU –LABAN ENTI SEMUA KITAI NEMU –AKU NYADANG KA UKAI SEMINA ADAT AJA TANG PEMAKAI MENUA TU DEKA ULIH DIAMBI PULAI LALU DEKA TEGAP, DEKA TETAP LALU MERUAN DIKELALA NYADI KA PENATAI ASAL KITAI BANSA DATAI KA ILA-ILA.
BAKANYA MEGA AMBI KE SEMUA ANAK-ANAK RAKYAT MALAYSIA TU NYENGKAUM SIDA KE DEKA TAUKA BISI AWAK NYADI HAKIM BA FEDERAL COURT JEMAH ILA –UDAH NEMU, UDAH NGELALA, UDAH MEDA SERETA UDAH MERETI- KE GUNA, TUJU ENGGAU PEMESAI RETI PEMAKAI MENUA KE UDAH DI-WAN, UDAH DIKENA SERETA UDAH DIEMPU (OCCUPIED TERRITORY) KITAI BA MENUA TU. ASAI AKU UTAI KE MANAH, UTAI KE ENGKEMAN, UTAI KE AMAT, UTAI KE LURUS SERETA UTAI KE NGEMAI PEMAIK -SIGI TAU NYADI~
Ari aku-
Mr. Andrew Paul
