Kenang pemansang aku ke sekali tu pasal rega ai enggau pemakai ba kedai kopi ke majak mar ari rega ti patut. Jangka aku kita pan sama udah ngasaika lebuh maya ngirup ba kedai kopi rega ai enggau pemakai rata-rata udah niki ari rega selama.
Ambika banding lebuh ngirup page kemari ba kedai Kopi Ah Peng (ukai nama ti bendar) aku ngirup Tea C Ais lalu rega ia RM1.90 segelas. Bandingka enggau taun nyin kemari endur ti sama rega ia semina RM1.40 segelas. Ditu kitai meda enti dikira ngena 'percentage' rega ia niki bisi lebih kurang 35%. Nama reti tu asai ba runding kitai ke 'pengguna' tu? Patutka enda rega tu terus dalam 'trend' bansa tu?
Nama kebuah kitai terus nejuka rega utai tu niki baka tu ia ti narit duit seringgit nyau kusut 50 sen setiap kali makai dikedai kopi. Enti kitai ngira puko kena ngeluarka segelas Tea C peng nya baru berapa; ai-RM0.02, tea-RM0.20, batu ais-RM0.03, gas kena ngagatka ai-RM0.10, susu-RM0.30
enggau servis RM0.10. Nyadi kos kena ngeluarka segelas Tea C Peng baru RM0.70. Retinya untung RM1.20. Ditu kita meda berapa peratus untung ti ulih sida ari nyual ai tu tadi bisi 180%.
Gaji kitai ti gawa perintah tauka gawa kompeni nadai niki dalam timpuh setahun. Tang setiap kali enti bonus tauka kinsit gaji rega barang ba kedai kope enggau utai bukai pan niki. Nyadi utai tu patut diperatika perintah enggau lebih silik, laban tiap kali bisi gaji lebih masuk rega utai pan niki. Orang ti ulih nagang utai tu ari terus niki bakatu nadai lebih ari kitai ke penguna. Kati chara kitai tau nagang rega tauka ka sida ti bisnes kedai kopi tu sepeneka hati nikika rega utai ke dijual sida?
Ba runding aku bakani enti kitai semina meli ai angat aja setiap kali duduk dikedai kopi. Kitai sama-sama mai 'sachet 3 in 1' baka Milo, Nescafe, Horlick, Tea enggau bansa ai bukai ti dikerinduka kita. Semina kitai muka lalu pasukka ba ai panas aja. Rega pan baru RM0.70 kitai meli ia sebungkus. Enti semua orang ngena chara tu jangka aku tentu sida ke busines kedai kopi nurun ke rega ia ba rega ti patut. Enda tak kelalu mar baka ka diatu.
No comments:
Post a Comment