Pengingat Regata Debak 2010

Bala rayat benung ngemata serta mendingka jaku peransang

YB Dato Sri Douglas Uggah ak Embas

Friday Belik,YB Dato Sri Douglas Uggah ak Embas,

Kaban Kunsil Nengeri (ADUN) Bukit Saban,YB Robert Lawson Chuat,

ADUN Saribas YB Dr Wahbi Junaidi &

Kaban Kunsil Nengeri ADUN Engkilili YB Dr Johnical Rayong ak Ngipa

YB Dato Sri Douglas Uggah ak Embas benung meri jaku peransang






Macha Doa

Sekeda ari barangka bisi di jual

Stall ka bisi alai orang bejual barang

Gaya jalai bemoa penatai muak ke Ulu Pasar Debak

Skeda ari Stall ke bejual barang

Bala raban indu kitai dayak ngena ngepan iban nganti penatai bala

raban YB ka dijangka bisi datai

Agi nganti penatai YB

Raban rayat mayuh benung ngemataka lumba perau

ke benung bekayuh ngansak ngagai adan

Sekeda ari raban mensia ti bisi datai ngemata pengerami ragata Debak 2010

Bala mensia mayuh benung nyinuk nganti penatai perau ka benung belumba lalu deka nemu

sapa perau ti nutung ba adan

Jenerino Jeraki enggau Band Boy iya benung merindang bala mayuh ka bisi datai enggau lagu Joget Rayat ke benung popular diatu

Rayat mayuh benung beperindang ninga ke patah sada nyawa Jenerino

Semadika nganti penatai YB penanyi ke diundang kemaya tu kemari Jenerino Jeraki enggau naka ulih merindang mensia mayuh di Debak

YB Dato Sri Douglas Uggah enggau bala raban iya benung bejalai nuju panggau berami enggau rayat di menoa Debak ti endang udah lama nganti penatai iya. Orang mayuh ngambi peluang tu mending kejaku ari pengari Parlimen sida iya ke datai sari nya.

YB Dato Sri Douglas Uggah benung betabi jari enggau bala rayat mayuh ti udah lama nganti penantai iya ke sari nya

Sekeda ari mensia mayuh benuh nyinuk ngamata ulih enggau ragam mensia ke datai sari nya.

Bala raban nembiak enda tinggal mega sama sama enggau ngerami Pesta Debak ke taun tu. Sida dipeda ngena pakaian bemacham ragam ngambika tau narit hati mensia mayuh.

PESTA DEBAK 2010

Lumba perau, panggau pengerindang, ‘fun fair’ enggau pengerami bukai ke tau ngasuh orang mayuh begelumu sereta beperindang endang dianti-anti bala rayat ti nguan menua pesisir kelebih agi bala rayat di Debak dalam bagi menua pegai Betong, Sarawak.

Kena 9/5/2010 ngagai 16/5/2010 pengerami Pesta Debak 2010 udah berengkah diaduka ba pasar Debak. Pengerami lumba perau pan berengkah diatur lalu udah dipejadika pegawai sitak Betong Friday Belik.

Di anggarka lebih kurang 10,000 iku mensia udah ngulu pengerami tu ba hari ti keterubah. Raban mensia ti diau ngelinggi pasar Debak ari ulu, ari ili enggau menua ti ngerimbai nya semua sampal nurun sari nya. Raban temui ari Saratok, Betong, Spaoh enggau serata menua Sarawak sama bisi ngusung lalu berami enggau rayat di Debak nyerumba Pesta Debak tu tadi.
Aku berasai temegah ati meda pemayuh mensia ti datai ngusung Pesta Debak tu tadi. Asai ba aku nyangka tu meh keterubah iya pengerami Pesta Debak tu udah digaga sereta digulu mensia ti chukup mayuh.Tau di kumbai Sejarah ba pengerami menua Debak, syabas ngusung bala raban AJK ngatur pengawa Pesta Debak. Amat pengawa lumba perau tu kala digaga sebedau tu tang raban mensia ti datai enda ngemayuh baka ke taun 2010 tu.
Tisi jalai enggau endur ka dikira tau endur nyankaika moto enggau motosikal nyau betusun. Jalai nyau pedis endur bepansa. Sida raban RELA pan nyau kisuh beraturka moto ke deka masuk enggau pansut ari pasar Debak.
Bala raban komiti AJK Pesta Debak sama bela kiruh nyediaka atur sereta pejalai pengawa pengarami tu. Bala sida ke kerja perintah, tuai-tuai rumah, penghulu, councilor enggau orang ke bekerja ngatika diri sama bela kiruh nentuka pengerami tu bejalai nitih ke atur pengawa ti udah diperambu.
Pengerami ti balat merindang ati bala raban mayuh iya nya Lumba Perau bisi diaduka kena ari enam enggau ari minggu. Mensia nyau baka semut ka nutu gula ngulu pengarami lumba perau tu. Tebing sungai Rimbas nyau bedijir laban mensia, baik ke mit enggau ketuai, be ansak ansak ngambika bulih endur ti tampak agi endur ngemataka ni bagi perau dinyulut ari pangan diri. Taja pan bisi ujan mensi-mensi pagi ari enam nya tang rayat enggau raban tenuai ti bisi datai enda ibuhka diri basah laban ti ransing,gidan enggau rindu meda pengerami ti lama udah enda diaduka ba pasar Debak.
Udah nya lumba ngena injin pam ai mega bisi diatur maya pengerami Pesta Debak tu tadi. Aku laban ke laun datai enda sempat nangkap gambar lumba injin pam ai ambi ke peda kitai mayuh.
Ari angkalan Debak sampai ke simpang jalai tama ngagai SMK Saribas Debak, nyau bedijir ‘Stall’ endur bejual barang olih raban ‘peniaga’ mit. Bemacham bansa utai bisi dijual. Gari, barang traditional, baka tawak, bendai, engkerumung, rawai sereta ngepan iban, baju burung mega bisi dijual, jam, gari English Premier League, bup sekula enggau baca rama pan sama bisi dijual. Bemacham buah, limau, anggur, mangga enggau mayuh ke bukai mega bisi dijual. Stall nyual ai enggau manuk tunu pan mayuh.
Kena hari enam iya nya 15/05/2010 ba pengawa nutup pengarami Pesta Debak , Menteri Sumber Asli dan Alam Sekitar YB Dato Sri Douglas Uggah ak Embas bisi datai di sempulangka Kaban Kunsil Nengeri (ADUN) Bukit Saban,YB Robert Lawson Chuat, ADUN Saribas YB Dr Wahbi Junaidi enggau Kaban Kunsil Nengeri ADUN Engkilili Dr Johnical Rayong ak Ngipa bisi sama bisi datai ba pengerami tu.
Penatai bala raban ti dipebasaka YB enggau tuai-tuai perintah lalu diperindang siku penanyi kitai iban ti tebilang iya nya Jenerino Jeraki ari Golden Pearl Production ti popular enggau lagu Palau, ngena lagu Joget Rayat. Sereta iya belagu dia deh bala mayuh lalu beraban, berempit-empit ngansak semak ngagai panggau endur penanyika belagu nya.
Udah tembu Jenerino Jeraki belagu joget rayat dia bala YB enggau pemesai perintah dibai meda orang di belumba perau sangkai lapan ti benung begugut nandang mansa mua grand stand ti endur sida iya duduk. Orang mayuh pan lalu be tusun-tusun baru bejalai tegar baka orang ke belumba bejalai kaki ba lumba Olympic, lalu sekeda nya belanda sampai nyau teterap besangkut ba randau ka baru madai bekau ditebas bala mayuh ba tebing sungai Rimbas nya tadi.
Tembu meda lumba perau dia bala YB sereta raban pemesai perintah lalu di bai ngagi pangau pemerindang lalu diasuh duduk ba kerusi sofa nganti maya YB Dato Sri Douglas Uggah ak Embas meri jaku peransang enggau lalau pendiau ngusung rayat mayuh.
MC lalu ngagauka AJK besai Pesta Debak 2010 iya Friday Belik meri jaku pengalalu ngagai raban YB enggau semua raban mensia ti bisi sama begelumu nandang ba pengerami nutup pesta tu. Sekeda ari jaku pengelalu iya madahka pengerami tu udah ulih narit mayuh temuai dalam menua tu empu datai, lalu ngarapka pengerami tu ulih ditampung ke dudi hari ila.
Udah tembu Friday Belik bejaku MC pan ngelaluka temuai ti dipebasaka YB Dato Sri Douglas Uggah ak Embas meri jaku peransang. YB berengkah bejaku ngena slogan ‘Satu….Malaysia’ lalu disaut rayat mayuh ngena jaku ‘Satu Malaysia’ mega. YB Dato Sri Douglas Uggah amat temegah ati meda pemujur pengerami Pesta Debak lalu ngaga anggur ngarapka pengerami tu tau diatur ninting taun lalu dipasukka ba kelendar pelancungan nengeri Sarawak baka Pesta Benak di Sri Aman. Siti ari utai ti narit ati iya lebuh ka datai meda Sg. Rimbas iyanya pemayuh reba ti larat. Dia iya lalu berunding deka nukar Pesta Debak nyadi PESTA REBA ketaun ti dudi ila. Laban ku iya nadai sungai udah dipeda iya mayuh reba baka sungai Rimbas tu. Tentu raban temui bisi pengingin ati deka meda reba Sg. Rimbas.
“Aku deka minta semua pengerami pesta ba sitak Betong tu di pansik baru ngambika iya enda ba hari enggau bulan ti sama. Udah nya baru pekit lumba tu ulih digaga ninting taun lalu nyadika tambah ngagai mayuh bengkah lumba dagang temuai ke disediaka di Sarawak, kelimpah ari pengawa ninting taun baka Pesta Benak di Sri tu,” ku iya nambah.
Iya mega sempat betundi madahka, ‘Ba lubuk di ili dia mayuh endar raban sida aki (jaku karung kena ngelalika jelu ai tauka Baya), enda ibuh dipadahka pan kita nemu meh. Uji beri-beri makai enggau sida nya!’ Ku iya lalu diserumbaka ketawa raban mayuh.
YB Dato Sri Douglas Uggah ak Embas meri RM60,000.00 , Dr Wahbi Junaidi mega meri RM20,000.00 ngagai komiti pengerami Pesta Debak 2010. Nambahka nya mega iya ngemendarka sereta bedanji meri RM300,000.00 kena belanja Projek ngemanahka tebing Sg. Rimbas. Projek tu ku iya di beri Kerajaan Barisan Nasional ti selalu ngemata, ninga sereta mendingka pengurang ti disepi rayat. Enti projek tu siap ila, orang mayuh bisi endur ti manah agi alai meda pengarami lumba perau enggau main ba ai ti bukai.

Pengingat Nyabung Manuk Nyerumba Mantar Gawai

Nyabung nyerumba gawai bisi digaga sekeda rumah panjai kena merindang ati tauka ambi ke main kena betundi enggau pangan diri begulai enggau bala kaban, menyadi enggau diri serumah ke pulai ari nengeri lebuh ngintu Hari Gawai Dayak. Ditu aku deka bekunsi enggau kita sekeda ari gambar ke bisi ditangkap aku kemaya Gawai 2009 tu tadi di Rumah Panjai Tr. Tambi Sg. Isu Krian Saratok. Nyabung tu semina kena merindang ati lemai hari sebedau datai malam kena ngitu Gawai Dayak sebedau beranchau tikai.

Maya udah tembu manuk ke bebintih iya ke menang nundi orangka alah ngambika tau ngasuh ketawa. Macham meh tundi ke tau digaga kena ngalaban pangan diri kemaya nya. Nadai ngeluie ari bansa bulu manuk ke tau kena nyemaka ke gaya pendiau pangan diri dalam pengidup tiap ari. Baka sema bujang biring menaning, apai burik bagas bejalai malam lalu mayuh ke bukai enda ulih engatka aku.

Tang utai kemanah maya tu orang ti sama bisi enggau nyabung betundi enggau pangan diri lebuh pulai semua ngayan ka mua puas ati sereta ransing begulai enggau pangan diri. Tu tau ngamanah ka kaul rayat ba rumah panjai nya empu sebedau ke begelumu bebala mayuh.

Udah tembu nyabung orang mayuh lalu berengkah nyediaka diri kena nyambut Gawai Dayak. Orang ke dirumah panjai lalu beranchau tikai tanda nyadi meh Gawai ke taun nya.

Pengingat Hari Gawai Rh. Sengalang Debak 2009

Gawai Dayak siti ari kebuah orang ke mindah ke nengeri tauka belelang ngagai menua bukai disarata dunya tu pulai ke rumah panjai betemu enggau diri sebilik.

Kami sebilik Apai, Indai, kami menyadi enggau bala anak

Menyadi aku Jonathan enggau Indai, Apai, anak

Maximus & Zety Unge

Taun tu aku mega enda ngelaung ari tradisi pulai ke menua berami gawai enggau diri sebilik sereta enggau kami serumah di Sengalang Debak.

Benung nyinuk nyamah makai malam

Kami sebilik sampal pulai gawai taun tu. Kena jam 8.00 p.m 31/05/2009 pengawa gelumu makai diketuai Apai aku empu lalu sembiang ke tanda meri terimakasih ke petara laban semua ulih begulai makai sekali agi ba malam Gawai taun 2009 ke sekali tu. Udah nya bala kami sebilik pan beradu makai laban udah tu lagi sama deka begelumu ngeradak ai pengayu ba ruai tuai rumah.

TR Edmund Guting benung meri jaku peransang Gawai

Kira jam 10.00 pm malam bala kami serumah pan begelumu ba ruai tuai rumah. Malam mantar gawai kena nganti jam 12.00 tengah malam sebedau ngirup ai pengayu TR Edmund Guting bisi bejaku ngelalu ke Gawai Dayak 2009 be mua mayuh ka udah lama begelumu be ruai iya enggau ruai ke ngimbai iya dia baka, mua ari setak ari ili ruai Labun, Munah lalu ari ulu ruai Thomas enggau ruai retired Pengajar Antas.

Ninga ka jaku ari tiap iko pengarika diangkatka bejaku

Benung nyinuk ningaka jaku ke dipansutka pengari tuai gawai

Sekeda ari jaku iya malam nya mesan semua bala ka mindah ngiga pengidup ngagai menua bukai anang enda mulaika diri enti lebuh maya ngintu gawai dayak. Iya mega mai mensia mayuh ba rumah panjai tu bejimat ngena belanja ngambika ruang bilik tau mansang ari taun siti ke taun ti ka datai. Ia ngelalau nembiak enti lebuh ka betundi serta bebuti enggau pangan diri anang enda begulai enggau manah, laban maya gawai pala sama ngelu enti kena palu ai bisa. Jaku nyangka tau kelanjur enggau pangan diri. Mayuh mega bala bisi di angkatka bejaku malam nya. Nyau rangkai rekung MC Mr. Ansam Santok ngagau orangka diangkat bejaku pesan Hari Gawai Dayak.

Sembiang Gawai diketuaika TR Edmund Guting

Bala mayuh sama besambiang
Kira 15 minit sebedau jam 12.00 tengah malam dia pengawa besembiang bisi digaga lalu diketuai TR Edmund Guting empu. Udah tembu bala mayuh lalu sama-sama ngeradak ai pengayu kena ngelai lalu ngayu ke semua raban enggau rayat rumah panjai Sengalang Debak.

Nyediaka kediri deka ngirup ai pengayu

Duduk dulu udah penat bediri kunsi ke penemu

Bebai ngirup enggau pangan diri

Pengawa bebuti, betundi sereta makai enggau ngirup ai enda bisa tauka bisa lalu berengkah. Lalu disambung enggau pekit karao-k betanda pocho pocho enggau main bukai nembiak baka ke malam nya kena nganti ka ngagai tiang pengingat pagi 1/6/2009.

Meri pengabang menyadi kitai Melayu ngirup & makai

GERIJA ST MARY FUND RAISING DINNER 2009

Fund raising dinner taun tu udah digaga kena 15/08/2009 beserimbai enggau setaun St. Mary's Church Jalai Matang udah di tumbuhka.


Penyanding penemu tauka chairman Fund . Raising Dinner 2009 tu betuaika Cikgu Ajol Aman.
Patron Fund Raising Dinner 2009 ianya Y.B Hj. Fadillah bin Haji Yusof, Ahli Parlimen P194, Petra Jaya, Timbalan Menteri, Kementerian Sains, Teknologi dan Inovasi enda ulih datai laban ti bisi pengawa bukai ti enda ulih diseliah. Taja pan pia iya diganti setiausaha politik iya empu iyanya, En. Daniel Jubang ak Datuk Kenneth Kayan.
Bala VIP ti sama bisi datai ba pegarami begelumu makai malam tu mega baka The Very Reverend,Aeries Sumping Jingan (Assistant Bishop Designate) enggau bini iya, enggau Fr. Lipson Timbang.
Penatai setiausaha politik YB disambut Chairman En. Steward Dawie, Sapit Chairman En. Ajol Aman enggau bala raban komiti sereta semua bala ti bisi enggau ba pengawa begelumu makai malam bebala mayuh ke lemai nya. Iya datai kena 7.30 lemai enggau nya pengawa ba lalu berengkah digaga.
Tuju pengawa Fund Raising Dinner tu digaga deka dikena kami ke ngelingi Jalai Matang tu ngumpul belanja dikena ngemansangka pengawa gerija St. Mary's Jalai Matang. Kelebih agi anggur pengawa kami ti deka nirika Gerija ba sebidang tanah ke nyadi agenda lumur satu bala raban komiti ke diatu. Fund Raising Dinner ke taun tu nyampau mija ke dibeli orang mayuh kira bisi sembilan puluh tujuh (97) iti. Lalu rega siti mija iya nya RM350.00.

Program makai begelumu bala mayuh ke malam nya berengkah enggau jaku pengalalu ari Chairman St. Mary's Church En. Steward Dawie, ngelaluka penatai semua bala mayuh ti bisi sama-sama bebelika meja kena nulung sereta mantu semua pengawa ti tau ngemajuka gerija tu dudi ari ila. Iya meri terimakasih ke pemanah ati sereta bantu ti diberi lalu ngarapka sukung sida iya enda semina ke malam nya aja tang betampung ngagai taun-taun ti deka datai.
Iya mega bisi mansutka peminta ari bala ti diau ba genturung semanjai Jalai Matang ti minta sebidang tanah ambika bisi endur nirika rumah gerija. Enggau bantu sereta tulung ari YB kami ke diau digenturung jalai Matang ditu ngarapka iya ulih meri jalai kena minta lalu tau bulih ke utai ti di juluk ati bala mensia manyuh ditu.
Udah tembu Chairman meri jaku pengelalu iya dia gintir The Very Reverend, Aeries Sumping Jingan meri jaku perasang sereta madah kati chara enggau gaya Gerija besai St. Thomas ulih mantu bala komiti Gerija St. Mary's ti minta tanah awakka bisi endur nirika gerija nya ila. Iya mega madahka langgur Gerija besai ti deka ngaduka, enti sema Gerija tu udah bediri ila, sida deka ngambi iya nyadikan 'centre of Anglican activity' kelimpah ari St. Basil, di Batu Kawa. Dikena iya ngujungka jaku iya malam nya dia iya meransang bala komiti bebendar agi ngereja pengawa laban pejalai agi jauh.


Udah tembu The Rev. Aeries Sumping bajaku nya baru gintir En. Daniel Jubang ak Datuk Kenneth Kayan mega bejaku ngarika YB Haji Fadillah b Hj. Yusof lalu macha text ti udah di tulis ke iya. Dalam text ti dibacha dia YB madahka pengawa bala komiti ti minta tanah nyadika top priority iya ketaun 2010 ru ila. Laban iya deka nentuka utai ti dipinta nya tau bulih nitihka juluk ati bala mensia mayuh. Kena iya ngujungka jaku, dia Mr Kenneth madahka YB bisi pemeri kena nambahka fund Gereja St. Mary.

En. Daniel Jubang ak Datuk Kenneth Kayan
macha text YB Haji Fadhillah Haji Yusof

Tembu iya meri jaku peransang dia pengawa ngetak kek birthday gerija St Mary pan lalu digaga diulu ke Chairman, Rev Aeries Sumping, Fr. Lipson enggau semua bala raban komiti gerija.

Chairman En. Steward Dawie nyuaka Souvenir ngagai En. Daniel Jubang

Udahnya Chirman lalu nyuaka Souvenir ngusung En. Daniel ke tanda terimakasih ari komiti Gerija St Mary.

Bala raban komiti enggau En. Daniel Jubang, Rev. Aeries Sumping & Bini, Chairman Steward Dawie, Fr. Lipson Timbang & Cikgu Ajol Aman (Penyanding FRD 2009)

Kek Birthday Gerija St. Mary Jalai Matang Kuching

Nanyi lagu Birthday Gerija St. Mary Jalai Matang Kuching

Ngerat Kek Birthday Gerija St. Mary Jalai Matang Kuching

Bala mayuh lalu di idang ke pemakai udah bekau pemakai diberekatka Fr. Lipson Timbang. Menu makai ke malam nya cukup ngemuaska semua bala ti bisi datai. Sida mega diperindang penanyi ti disponsor bala mayuh. Penanyi baka Margaret M. Jalang mega bisi datai sama enggau meli mija ba pengerami fund raising tu tadi lalu di sponsor belagu olih orang mayuh baka ke malam nya.

Kami bala komiti Gerija St. Mary Jalai Matang ngarapka orang mayuh terus mantu lalu sukung kita amat diberi terimakasih.