HARI MALAYSIA

Meri Selamat Hari Malaysia ke semua rayat ti deka diintu ba Bintulu kena 16/9/2012 tu. Sama-sama meh kitai ngintu lalu ngingat ke tuju enggau kebuah kitaika masuk serakup Malaysia tu 49 taun ti udah. Arap ke kitai sama-sama bisi pemereti ati terus mansang lalu mupuk enggau orang ngayuhka perau pemansang ke diri empu enggau ke menua ti di kesayauka kita tu Sarawak, Malaysia. Anang enda betatika chara kena meransang diri nempuh dunya kemaya diatu ke majak 'mencabar' baik nya ari segi penatai pemisi, pendiau enggau runding dikena ngidup kediri. Penyarakup enggau diri sebilik, kaban belayan, diri serumah, diri semenua, diri Sarawak enggau diri SeMalaysia. Anang ngasuh politik mechah ke penyarakup sereta kaul nya, tang kena meh politik kena ngemansang ke ruang bilik enggau bansa.

Sama-sama meh kitai nyambut Hari Malaysia enggau hati ti endang angkun ke bansa diri enggau menua. MERDEKA

RUNDING KENANG PEMANSANG MENUA PESISIR



Berubah ari baka tu

Aku terperansang ati meda berita ba The Sunday Post lambar no 4 ke ditulis James Ling saritu 12/08/2012 iya ti ngena ‘title’, “JABU: Let’s work hard instead of quarrelling.” Ia ti ka di bai aku sama-sama diperatika kitai.

Sapit Kepala Menteri Datuk Patinggi Tan Sri Alfred Jabu lebuh ke makai ‘berbuka Puasa’ kena lemai ari lima enggau Menteri Besai menua Malaysia Datuk Seri Najib Tun Razak di Kuching tu tadi bisi bejaku munyi tu, “I believe urban folks too want development in the rural areas. It’s in the interest of the urban people to help the government develop the rural areas. Urban people can help by, among others, quarrelling less and concentrate on the development instead. When the rural areas are developed, they’ve higher income and more money to spend. Hence it benefits urban people in the long run.”

Datuk Sri Jabu pecayaka kitai ti diau dimenua pesisir sama keran deka mansang. Ari pengeran ati Menteri Besai menua Malaysia ke deka meda raban bansa kitai dayak ke diau di menua pesisir tauka jauh di ulu ai mansang sama enggau rayat ke ba nengeri enggau bansa bukai, ngujungka ia ngerembaika penemu sereta meransang kitai sama-sama sejalai enggau perintah ngambika pemansang ulih dibai ngagai menua pesisir. Tiap projek ke dibai tauka ditumbuhka perintah ba menua pesisir endang mai tuju ti deka meri penatai duit ringgit ba ikas ke ngasuh kitai keluar ari penyaranta. Baka pengawa ti numbuhka estet getah udah ditentuka tau meri penatai duit ringgit ti meruan ngagai sida ti ngemeranka pengawa nya. Pemujur pengawa tu ia ti udah digaga lebih sepuluh taun ti udah ulih dipeda kitai ba menua pegai Betong. Diatu nanam sawit mega siti ari pengawa ke tau ngeluarka hasil duit ringgit ngagai kitai rayat menua pesisir. Lebuh ti pulai kemenua diri di Debak sepemanjai jalai ari Kuching ati aku berasai temegah meda sawit udah nyau bedijir ditanam ba serata bengkah menua puang ba sepemanjai jalai. Kadang-kadang nyau deka rapas mata meda dandang kebun sawit.

Kitai anang enda tebuka ati meda gaya pemasang bala rayat di Semanajung Malaysia ke udah jauh nyulut ari kitai ti dimenua Sarawak ditu. Enti kitai bisi kabanka belelang gawa di seberai din kitai tau betanya ngagai sida iya, penyamai, pengelantang sereta pengerindu diau dia. Enda pia pan kitai tau meda ba berita ke selalu dipancharka ba TV udah chukup ngasuh kitai beperagam ba ati diri kati gaya pemansang sida diseberai din. 

Beketu rampa menua ulu ti ba ati kitai


Ari pengigin tauka peneka ati kitai ti dimenua pesisir mantu perintah ngemansangka menua kitai, sama-sama meh kitai ngemujurka pemansang ti dibai ngagai kitai. Tu ngambika kitai tau sama maju lalu bulih pendiau ti meruan sereta likun nundaka utaika dikedeka ke rayat di menua pesisir. Enti penatai duit ringgit kitai udah entap nya tau ngagauka pemansang bukai baka elektrik enggau ai datai ngagai kitai ti jauh di ulu sungai. Nadai kebuah ‘kemudahan asas’ baka tu enda ulih dibai perintah enti penatai duit ringgit kitai di menua pesisir udah keluar ari tikas penyaranta. Kelebih agi elektrik sigi siti ari pemisi ti endang dianti-anti rayat menua pesisir datai nyeguk lalu diau entap enggau sida ia seumur idup. Laban kitai sama nemu elektrik tu tau ngasuh mayuh kereban bukai ti ngemudahka pengawa tau dikembuan tiap iku ruang bilik.

Siti ari chara kitai menua pesisir tau nulung penatai pemansang tu, ianya ngurangka penyarut tauka kachau ari segi runding enggau penemu lalu majakka pengawa pemansang ti di bai datai ba menua kitai. Kitai anang bekelikuh ke pemansang ti dibai perintah tegal kita ti enda sama parti politik. Sekeda nyukung parti pampang perintah A, B, C, pemangkang A, C,tauka D. Enti kitai agi bekelikuh ke politik ba rumah panjai tauka ba kampung(rumah nyembuah) utai ti dikumbai buah pemansang enda ulih datai ngarayap, belanda ngagai kitai. Laban penatai pemansang tu enda tau dititihka antu ti dikumbai kitai penyarut baikka ari segi ati enggau runding. Iya patut datai lalu ngujungka kitai ke empu menua makin berakup enggau diri serumah ngambika pemansang nya ngemudahka ke kitai ngulihka utai ti dikemeranka ati. Setiap kitai ke diau ba menua ke diberi pemansang patut sama-sama ngena pemansang nya kena nambahka penatai pemisi diri sebilik awakka duit ringgit ke dikembuan kitai datai ba tikas pansut ari penyaranta.

Enti menua pesisir mansang, sida tau bisi penatai duit ringgit ti chukup lalu bisi duit ti lebih kena bebelika utai ti diguna besari-sari. Enggau nya buah pemansang tau meri penguntung ngagai rayat di menua pesisir ba taun-taun ti deka datai dudi hari ila. Nya alai buah pemansang ke datai ba menua pesisir anang enda disambut kitai enggau ati sereta runding ti positif. Anang ngasuh beda dalam parti politik ngasuh kitai enda ulih berunding enggau rasional, lalu enggai nerima tajapan minoriti aja ti enggai. Utai ke dikumbai pemansang sigi pengujung ia endang kena ngemansangka sereta meransang kitai lebih ari taun-taun, bulan, hari, jam sereta minit ti udah lelang ninggalka kitai. Penyarakup kitai meh ti ngasuh kitai kering lalu mai pemansang tama ngagai menua kitai pesisir tau ngujungka penatai duit ringgit ba tiap iko ruang bilik kitai betambah. Enti ikas penatai pemisi ruang bilik kitai mansang, enggau nya chara idup kitai mega tau berubah manah.

Sebengkah endur di Kuala Lumpur di peda ari Menara Bumiputra


Buka meh atika pemansang lalu buai antu penyarut ari runding enggau ati kitai. Ambi meh manang awakka ia belian muai antu ke kepapaska pemansang lalu ngawakka jalai ngagai penemu ti positif awakka bansa kitai dayak tau idup lantang sereta bisi pemisi baka bansa bukai. Awakka ba Wawasan 2020 ila kitai sama bediri sama tinggi sereta duduk sama baruh enggau bansa bukai.

DUIT PINCHIN (Gratuity)



Berunding ka Duit Penchin kena ngemanahka rumah


Kala tauka enda kita ke gawa perintah berundingka duit pinchin ulih diambi sebedau datai ba maya badu lebuh umur kita 55, 58 tauka 60 tahun. Ianya 7 tahun sebedau kita PINCHIN. Ditu aku deka bekunsi enggau bala kaban ti jauh di entigis ulu sungai tauka kita ti diau ba kandang nengeri. Aram kitai bekelala enggau Skim Pinchin tu. Skim tu udah di enkebang Bank Muamalat Malaysia Berhad (BMMB) kena meri peluang ngusung semua orang ti gawa perintah nyediaka diri ari segi duit ringgit kena napi dunya orang pinchin. Duit tau diambi dulu (advance) ari penyampau duitka patut diterima lebuh kemaya pinchin ila (pinchin/ngetu kerja). Penyampau duitka ulih diambi dikira nitihka 'Gaji Puku' ke pemadu baru (latest salary).

NAMA KEBUAH TAUKA TUJU DUIT PINCHIN KITA TAU DIPANSUTKA DULU?
1. Meli reta baka kereban perengka tauka pemisi dirumah,
2. Puku kena ngaduka dagang(business),
3. Beranakka duit tauka nambahka penyampau duit sebedau kita datai ba maya pinchin. Chunto: Simpan ba Amanah Saham Nasional(ASB), Meli Mas, Unit Trust, tauka endur bukai ke dijangka tau meri penguntung ti lebih mayuh agi.
4. Kena ngabiska utang. Anang nejuka utang nya ngasuh kitai enda nyamai tinduk ke tau ngujungka bemacham bansa penyakit deka datai nyenguk. Utang asuh pinchin dulu ari kitai, 5. Kena ngemanahka rumah. Anang nganti udah pinchin baru ngubah rumah nyerumbaka ia ke dalam mimpi tauka pengingin ati,
6. Meli Tanah, enggau
7. Meli Insurance Hospital, enggau utai bukai ti tau nguntungka kita.

CHARA BMMB MAYAR
1. Bisi Akaun ba BMMB,
2. Gaji dipindah ngagai BMMB,enggau
3. Duit pinchin ke udah dikemendarka(approved) BMMB dikreditka/masuk ngagai akaun Simpanan nya tadi. Tang duit masuk sepengudah gaji kita dipindah ngagai BMMB.

CHIRI (Features)Duit Pinchin
1. Cas BMMB 6.75% setaun,
2. Nadai bayar bulan,
3. Enda begunaka orang nyamin,
4. Diberi 70% ari penyampau duit pinchin ke dijangka diterima lebuh pinchin,
5. Nyampu tau di injau RM10,000 - RM200,000 nitihka tikas gaji, enggau
6. Enti kena 'blacklist' pan tau minta ngeluar anang 'bankrupt' aja.

SAPA TI TAU NGINJAU?
1. Pengerja pengawa perintah-Kerajaan Nengeri enggau Kerajaan Persekutuan (Tetap & Bepinchin),
2. 1 tahun ngagai 7 tahun sebedau pinchin,
3. Enda Bankrupt, enggau
4. Gaji ba BMMB

DOKUMEN
1. Kad Pengelala (IC),
2. Slip Gaji 'latest' Asal, enggau
3. Borang Opsyen Pekeliling 2011
Semua dokumen mesti disahkan.

PENGUJUNG
Kena meh peluang tu nambahka duit pinchin kita. Enti kita nejuka duit pinchin kita ba Tabung Pinchin kita nemu penyampau duitka deka diterima kita lebuh pinchin ila. Tang enti kita ngeluarka skeda ari duit pinchin nya lalu diperanakka tentu ia tau meri penyampau TI lebih agi mayuh ari ke patut diterima lebuh kita pinchin. Agi pan duit Nya udah ba pegai kita, lebuh kita bisi hal 'emergency' kita enda ibuh nganti maya pinchin tauka ngijau ari Bank tauka Along kena napi penangul nya. Perundigka meh kaban.

Deka Datai-DUIT PINCHIN (Gratuity Fund)

Ba post ti deka datai aku deka bekunsi enggau kita pasal NGAMBI(ADVANCE) DUIT PINCHIN sebedau kita TI kerja Perintah pinchin, ianya 7(tujuh) taun sebedau badu.Kita ulih ngambi duit tu kena kita nyediaka pemisi ari segi WANG ringgit ti chukup kena napi pengidup udah bekau PINCHIN. ANTI MEH DULU TAUKA KA TELEPON ngagai aku. Aku deka ngelansa enggau silik ba post di deka datai.

Betemu Baru

Lama endar udah enda nulis tauka post ba blog aku tu. Ukai nama bala kaban, nadai hari laban ti kiruh digasakka pengawa di opis. Aram meh kitai sama bekunsi ke utai ti bisi nyadi ba ngelingi endur kitai diau. Dimenua kami di Genturung pendiau di Matang Jaya ditu, ma lemai hari lalu belabuh ujan. Ba musim menyadi kitai Melayu bepuasa selalu penuh pasar Matang laban bala mensia ti begigaka barang pemakai di Pasar Ramadhan Matang ditu. Macham bans a pemakai bisi dijual dia. Pansuh manuk pan bisi mega dijual taun tu. Kelimpah ari nya dia bisi sukut sebelah Kedai di Matang ditu kitai bisi meda bala kaban kitai Melayu bejual ke barang pemakai, ngambi peluang ari mayuh raban ti bekerja nadai hari berapi. Enti kita bisi rembus ke Matang Jaya ditu lebuh ujung minggu anang enda ingat bejalai nuchi mata ba EMart Lee Ling. Rega barang ba endur tu Bepatutan Ku orang Melayu. Betemu baru ba hari TI deka datai.

Pengingat Regata Debak 2010

Bala rayat benung ngemata serta mendingka jaku peransang

YB Dato Sri Douglas Uggah ak Embas

Friday Belik,YB Dato Sri Douglas Uggah ak Embas,

Kaban Kunsil Nengeri (ADUN) Bukit Saban,YB Robert Lawson Chuat,

ADUN Saribas YB Dr Wahbi Junaidi &

Kaban Kunsil Nengeri ADUN Engkilili YB Dr Johnical Rayong ak Ngipa

YB Dato Sri Douglas Uggah ak Embas benung meri jaku peransang






Macha Doa

Sekeda ari barangka bisi di jual

Stall ka bisi alai orang bejual barang

Gaya jalai bemoa penatai muak ke Ulu Pasar Debak

Skeda ari Stall ke bejual barang

Bala raban indu kitai dayak ngena ngepan iban nganti penatai bala

raban YB ka dijangka bisi datai

Agi nganti penatai YB

Raban rayat mayuh benung ngemataka lumba perau

ke benung bekayuh ngansak ngagai adan

Sekeda ari raban mensia ti bisi datai ngemata pengerami ragata Debak 2010

Bala mensia mayuh benung nyinuk nganti penatai perau ka benung belumba lalu deka nemu

sapa perau ti nutung ba adan

Jenerino Jeraki enggau Band Boy iya benung merindang bala mayuh ka bisi datai enggau lagu Joget Rayat ke benung popular diatu

Rayat mayuh benung beperindang ninga ke patah sada nyawa Jenerino

Semadika nganti penatai YB penanyi ke diundang kemaya tu kemari Jenerino Jeraki enggau naka ulih merindang mensia mayuh di Debak

YB Dato Sri Douglas Uggah enggau bala raban iya benung bejalai nuju panggau berami enggau rayat di menoa Debak ti endang udah lama nganti penatai iya. Orang mayuh ngambi peluang tu mending kejaku ari pengari Parlimen sida iya ke datai sari nya.

YB Dato Sri Douglas Uggah benung betabi jari enggau bala rayat mayuh ti udah lama nganti penantai iya ke sari nya

Sekeda ari mensia mayuh benuh nyinuk ngamata ulih enggau ragam mensia ke datai sari nya.

Bala raban nembiak enda tinggal mega sama sama enggau ngerami Pesta Debak ke taun tu. Sida dipeda ngena pakaian bemacham ragam ngambika tau narit hati mensia mayuh.

PESTA DEBAK 2010

Lumba perau, panggau pengerindang, ‘fun fair’ enggau pengerami bukai ke tau ngasuh orang mayuh begelumu sereta beperindang endang dianti-anti bala rayat ti nguan menua pesisir kelebih agi bala rayat di Debak dalam bagi menua pegai Betong, Sarawak.

Kena 9/5/2010 ngagai 16/5/2010 pengerami Pesta Debak 2010 udah berengkah diaduka ba pasar Debak. Pengerami lumba perau pan berengkah diatur lalu udah dipejadika pegawai sitak Betong Friday Belik.

Di anggarka lebih kurang 10,000 iku mensia udah ngulu pengerami tu ba hari ti keterubah. Raban mensia ti diau ngelinggi pasar Debak ari ulu, ari ili enggau menua ti ngerimbai nya semua sampal nurun sari nya. Raban temui ari Saratok, Betong, Spaoh enggau serata menua Sarawak sama bisi ngusung lalu berami enggau rayat di Debak nyerumba Pesta Debak tu tadi.
Aku berasai temegah ati meda pemayuh mensia ti datai ngusung Pesta Debak tu tadi. Asai ba aku nyangka tu meh keterubah iya pengerami Pesta Debak tu udah digaga sereta digulu mensia ti chukup mayuh.Tau di kumbai Sejarah ba pengerami menua Debak, syabas ngusung bala raban AJK ngatur pengawa Pesta Debak. Amat pengawa lumba perau tu kala digaga sebedau tu tang raban mensia ti datai enda ngemayuh baka ke taun 2010 tu.
Tisi jalai enggau endur ka dikira tau endur nyankaika moto enggau motosikal nyau betusun. Jalai nyau pedis endur bepansa. Sida raban RELA pan nyau kisuh beraturka moto ke deka masuk enggau pansut ari pasar Debak.
Bala raban komiti AJK Pesta Debak sama bela kiruh nyediaka atur sereta pejalai pengawa pengarami tu. Bala sida ke kerja perintah, tuai-tuai rumah, penghulu, councilor enggau orang ke bekerja ngatika diri sama bela kiruh nentuka pengerami tu bejalai nitih ke atur pengawa ti udah diperambu.
Pengerami ti balat merindang ati bala raban mayuh iya nya Lumba Perau bisi diaduka kena ari enam enggau ari minggu. Mensia nyau baka semut ka nutu gula ngulu pengarami lumba perau tu. Tebing sungai Rimbas nyau bedijir laban mensia, baik ke mit enggau ketuai, be ansak ansak ngambika bulih endur ti tampak agi endur ngemataka ni bagi perau dinyulut ari pangan diri. Taja pan bisi ujan mensi-mensi pagi ari enam nya tang rayat enggau raban tenuai ti bisi datai enda ibuhka diri basah laban ti ransing,gidan enggau rindu meda pengerami ti lama udah enda diaduka ba pasar Debak.
Udah nya lumba ngena injin pam ai mega bisi diatur maya pengerami Pesta Debak tu tadi. Aku laban ke laun datai enda sempat nangkap gambar lumba injin pam ai ambi ke peda kitai mayuh.
Ari angkalan Debak sampai ke simpang jalai tama ngagai SMK Saribas Debak, nyau bedijir ‘Stall’ endur bejual barang olih raban ‘peniaga’ mit. Bemacham bansa utai bisi dijual. Gari, barang traditional, baka tawak, bendai, engkerumung, rawai sereta ngepan iban, baju burung mega bisi dijual, jam, gari English Premier League, bup sekula enggau baca rama pan sama bisi dijual. Bemacham buah, limau, anggur, mangga enggau mayuh ke bukai mega bisi dijual. Stall nyual ai enggau manuk tunu pan mayuh.
Kena hari enam iya nya 15/05/2010 ba pengawa nutup pengarami Pesta Debak , Menteri Sumber Asli dan Alam Sekitar YB Dato Sri Douglas Uggah ak Embas bisi datai di sempulangka Kaban Kunsil Nengeri (ADUN) Bukit Saban,YB Robert Lawson Chuat, ADUN Saribas YB Dr Wahbi Junaidi enggau Kaban Kunsil Nengeri ADUN Engkilili Dr Johnical Rayong ak Ngipa bisi sama bisi datai ba pengerami tu.
Penatai bala raban ti dipebasaka YB enggau tuai-tuai perintah lalu diperindang siku penanyi kitai iban ti tebilang iya nya Jenerino Jeraki ari Golden Pearl Production ti popular enggau lagu Palau, ngena lagu Joget Rayat. Sereta iya belagu dia deh bala mayuh lalu beraban, berempit-empit ngansak semak ngagai panggau endur penanyika belagu nya.
Udah tembu Jenerino Jeraki belagu joget rayat dia bala YB enggau pemesai perintah dibai meda orang di belumba perau sangkai lapan ti benung begugut nandang mansa mua grand stand ti endur sida iya duduk. Orang mayuh pan lalu be tusun-tusun baru bejalai tegar baka orang ke belumba bejalai kaki ba lumba Olympic, lalu sekeda nya belanda sampai nyau teterap besangkut ba randau ka baru madai bekau ditebas bala mayuh ba tebing sungai Rimbas nya tadi.
Tembu meda lumba perau dia bala YB sereta raban pemesai perintah lalu di bai ngagi pangau pemerindang lalu diasuh duduk ba kerusi sofa nganti maya YB Dato Sri Douglas Uggah ak Embas meri jaku peransang enggau lalau pendiau ngusung rayat mayuh.
MC lalu ngagauka AJK besai Pesta Debak 2010 iya Friday Belik meri jaku pengalalu ngagai raban YB enggau semua raban mensia ti bisi sama begelumu nandang ba pengerami nutup pesta tu. Sekeda ari jaku pengelalu iya madahka pengerami tu udah ulih narit mayuh temuai dalam menua tu empu datai, lalu ngarapka pengerami tu ulih ditampung ke dudi hari ila.
Udah tembu Friday Belik bejaku MC pan ngelaluka temuai ti dipebasaka YB Dato Sri Douglas Uggah ak Embas meri jaku peransang. YB berengkah bejaku ngena slogan ‘Satu….Malaysia’ lalu disaut rayat mayuh ngena jaku ‘Satu Malaysia’ mega. YB Dato Sri Douglas Uggah amat temegah ati meda pemujur pengerami Pesta Debak lalu ngaga anggur ngarapka pengerami tu tau diatur ninting taun lalu dipasukka ba kelendar pelancungan nengeri Sarawak baka Pesta Benak di Sri Aman. Siti ari utai ti narit ati iya lebuh ka datai meda Sg. Rimbas iyanya pemayuh reba ti larat. Dia iya lalu berunding deka nukar Pesta Debak nyadi PESTA REBA ketaun ti dudi ila. Laban ku iya nadai sungai udah dipeda iya mayuh reba baka sungai Rimbas tu. Tentu raban temui bisi pengingin ati deka meda reba Sg. Rimbas.
“Aku deka minta semua pengerami pesta ba sitak Betong tu di pansik baru ngambika iya enda ba hari enggau bulan ti sama. Udah nya baru pekit lumba tu ulih digaga ninting taun lalu nyadika tambah ngagai mayuh bengkah lumba dagang temuai ke disediaka di Sarawak, kelimpah ari pengawa ninting taun baka Pesta Benak di Sri tu,” ku iya nambah.
Iya mega sempat betundi madahka, ‘Ba lubuk di ili dia mayuh endar raban sida aki (jaku karung kena ngelalika jelu ai tauka Baya), enda ibuh dipadahka pan kita nemu meh. Uji beri-beri makai enggau sida nya!’ Ku iya lalu diserumbaka ketawa raban mayuh.
YB Dato Sri Douglas Uggah ak Embas meri RM60,000.00 , Dr Wahbi Junaidi mega meri RM20,000.00 ngagai komiti pengerami Pesta Debak 2010. Nambahka nya mega iya ngemendarka sereta bedanji meri RM300,000.00 kena belanja Projek ngemanahka tebing Sg. Rimbas. Projek tu ku iya di beri Kerajaan Barisan Nasional ti selalu ngemata, ninga sereta mendingka pengurang ti disepi rayat. Enti projek tu siap ila, orang mayuh bisi endur ti manah agi alai meda pengarami lumba perau enggau main ba ai ti bukai.

Pengingat Nyabung Manuk Nyerumba Mantar Gawai

Nyabung nyerumba gawai bisi digaga sekeda rumah panjai kena merindang ati tauka ambi ke main kena betundi enggau pangan diri begulai enggau bala kaban, menyadi enggau diri serumah ke pulai ari nengeri lebuh ngintu Hari Gawai Dayak. Ditu aku deka bekunsi enggau kita sekeda ari gambar ke bisi ditangkap aku kemaya Gawai 2009 tu tadi di Rumah Panjai Tr. Tambi Sg. Isu Krian Saratok. Nyabung tu semina kena merindang ati lemai hari sebedau datai malam kena ngitu Gawai Dayak sebedau beranchau tikai.

Maya udah tembu manuk ke bebintih iya ke menang nundi orangka alah ngambika tau ngasuh ketawa. Macham meh tundi ke tau digaga kena ngalaban pangan diri kemaya nya. Nadai ngeluie ari bansa bulu manuk ke tau kena nyemaka ke gaya pendiau pangan diri dalam pengidup tiap ari. Baka sema bujang biring menaning, apai burik bagas bejalai malam lalu mayuh ke bukai enda ulih engatka aku.

Tang utai kemanah maya tu orang ti sama bisi enggau nyabung betundi enggau pangan diri lebuh pulai semua ngayan ka mua puas ati sereta ransing begulai enggau pangan diri. Tu tau ngamanah ka kaul rayat ba rumah panjai nya empu sebedau ke begelumu bebala mayuh.

Udah tembu nyabung orang mayuh lalu berengkah nyediaka diri kena nyambut Gawai Dayak. Orang ke dirumah panjai lalu beranchau tikai tanda nyadi meh Gawai ke taun nya.