Baum enggau YB Tuan Hj. Fadillah Hj Yusof Sapit Menteri Sains, Teknologi & Innovasi Malaysia

Hari ti dianti betemu enggau YB Tuan Hj. Fadillah Hj. Yusof pan datai nitihka disemaya iya enggau bala raban komiti gerempung Gereja St. Mary, Jalai Matang, Kuching ti ngepunka aum senentang peminta pasal tanah endur tiang pemun gereja St. Mary iyaka udah diperambuka dalam bulan Lapan 2008 tu tadi.

Kena hari enam 7/3/2009 bala raban komiti ti betuaika Sapit Chairman Cikgu Ajol Aman enggau bala raban komiti bukai bisi datai ngusung opis PBB Parlimen P194 Petra Jaya ba Jalai Astana, Kuching. Bala raban ti datai kia di sambut ‘Personal Secretary’ YB iya nya Mr. Moshidi enggau bala staf iya enggau chukup basa. Kami datai dia kira iya jam 9.25 pagi. Bala raban komiti ti sama bisi datai pagi nya baka Mr. Low Marin (Secretary), Mr. Isau Omar ( Treasurer), Mr. Peter Anis (Lay Leader), Mr. Nanta Gisang, Mr. Anyau Belun, Mr. Andrew Gani, Cikgu Morgan Batai enggau Mr. Kembah Wah. Kami lalu dibai personal secretary YB Tuan Hj. Fadillah ngagai opis endur baum ba tingkat 3 semadika nganti penatai YB. Kami diberi ai kopi enggau teh sereta enggau kuih mimit kena betunga sereta berandau. Kelimpah enggau nya Mr. Morshidi bisi nerangka mimit ngagai bala kami sebuat pasal pengawa enggau aktiviti ujung minggu YB bekau iya ti pulai bejalaika pengawa iya ari seberai (Semananjung Malaysia) nyadi ahli parlimen.
Tuju penatai kami sebuat iya nya nampung peminta gerempung kitai di Jalai Gita/ Matang Jaya ti deka ngaga Gereja lalu begunaka tanah ti numbas iya pemesai endur ngentak tauka pelasar Gereja St Mary nya ila. Perambu peminta tu udah lama di anjung, laban ti tekul ulih pengawa iya ba kementerian, YB lalu apin bisi awak ulih betemu enggau bala raban komiti kelimpah ke hari enam tu tadi.
Kira jam 10.15 pagi YB pan datai. Udah ke bekelala enggau bala kami ti datai dia pagi nya YB pan terus berandau ke pasal peminta ti udah diperambuka bala raban kitai ngelama tu. Tang laban semua perambu peminta endang sigi udah lama diberi, nya alai iya semina meri lalu madah utaika patut digaga ngambika peminta nya ulih lengkas teputar. YB ngasuh bala raban komiti nyediaka penyampau raban kitai orang kristian ba rampa genturung pendiau ditu enggau sapa ti dikarapka megai gerempung tu (Office Bearer). Iya madah ngagai personal secretary iya utaika patut digaga kena nyukung peminta kitai ngagai orang ti bisi kuasa serta ulih ngemujurka peminta tu. Penudi sekali iya madahka enti semua utai ti diasuh iya udah disedia serta bisi magang YB madahka iya empu deka enggau bala komiti betemu enggau Sapit kepala Menteri iya nya Tan Sri Datuk Patinggi Alfred Jabu ak Numpang. Aum kami enggau YB tembu kira jam 10.45 pagi, kami sebuat lalu nyurutka diri laban kami nemu agi bisi orang bukai deka betemu enggau iya kelimpah ari raban kami nya tadi.

Centre Gereja St Mary Matang Jaya

Perambu ti deka ngaduka Centre ba genturung pendiau sepemanjai jalai Gita/Matang diatu udah nyadi nyata, lalu endur centre nya diaduka ba pasar Matang Jaya, Kuching.

Kitai bala raban kristian anglika ke diau di genturung sepemanjai Jalai Gita ngagai Jalai Matang tau datai ditu besambiang tiap hari minggu jam 8.00 pagi. Kita tau datai ngagai Apartment Unit No. 88A (Tingkat 1 ba mua) Blok J, Synergy Square, Jalai Matang Kuching. Endur tu ulih muat lebih kurang 80 iko orang lebuh sekali-sekali sembiang. Sembiang tiap hari minggu ditu deka di iring Fr. Lipson Timbang.

Centre Gereja St Mary Matang Jaya tu dibuka lalu di ‘blessing’ kena 28/02/2009 olih Archdeacon Micheal Buma, lalu pengawa sambiang mass mega diatur beserimbai enggau pengawa ‘opening ceremony’ nya. Nyampau raban kitai kristian anglika ke sama-sama bisi enggau datai ngerami pengawaka malam nya bisi 99 iko. Bala ti datai udah tembu sembiang mass lalu di beri makai enggau ngirup olih bala raban komiti ti ngukun gerempung kitai ba genturung pendiau ditu.
Malam nya Archdeacon kitai bisi mansutka jaku madah ngasuh kitai di genturung pendiau semanjai jalai Gita enggau Matang ditu meruan begerempung enggau pangan diri ngambika pengarap kitai majak ngerembai lalu di temu orang mayuh.
‘Tu meh gereja kita, tajapan iya dikumbai centre, laban tu meh ke udah diberi Tuhan kitai endur kita berandau serta besampi pasal pemesai kuasa Tuhan ngagai kitai mensia di dunya ditu. Gereja Moden, nunda, tauka nitihka pemansang dunya kemaya hari tu sebedau kita ditu ke bulih tanah endur kita nirika Gereja ti besai agi.” ku Fr. Micheal Buma, malam nya. Pia mega iya mesan laban tu nama aja ke centre tang iya endang ambika gereja ke raban kitai ti diau semak ditu, endur enda tau enda ngaduka sambiang tiap hari minggu baka ti ba Gereja besai kitai di St Thomas Cathedral ba Jalai Mc Dougall, Kuching.
Sambiang hari minggu ke terubah udah digaga ba centre tu kena 8/3/2009 lalu penyampau orangka bisi datai maya tu kemari bisi 69 iko. Bala raban komiti ngarapka semua kitai raban kristian anglicaka diau semak jalai Gita/Matang ditu sama bela ulih nganataika diri besambiang ba minggu ti deka datai ila.

Jalai Bedayaka Mayuh Nembiak Masuk Universiti

Kuching: Aum besai Tiap Taun Gerempung Graduan Dayak Sarawak (SDGA) deka mutarka bakani deka ngulihka mayuh agi biasiswa kena nulung mayuh agi nembiak sebansa nyambung sekula sida iya ngagai universiti.
Presiden SDGA, Dr. Joseph Jawa Kendawang madahka atur nya kena nambah pemayuh anak bebansa Dayak ngulihka pelajar tinggi, lalu mantu ngangkatka tikas ekonomi.
“Entara pelan strategik lima taun kami ke deka dipejuraika ba aum nya bekait enggau pelajar.
“Kami ngarapka JPA (Jabatan Perkhidmatan Awam) deka meri mayuh agi biasiswa ngagai nembiak Dayak,” ku iya madah ba aum nya ngagai media lebuh iya meri basa ngagai Sapit Kepala Menteri Datuk Patinggi Tan Sri Alfred Jabu ditu, kemari.
Ku Jabu, SDGA ke betatika deka ngemansangka pelajar nya nitihka atur perintah ke deka ngeluarka mayuh agi raban Dayak ke pandai.
Tu pan manah kena ba Koridor Kuasa Taun Dikena Baru (Score) ke deka begunaka mayuh orang ke bisi pengelandik ba semua bidang.
“Enggau atur pengawa SDGA ke ngasuh mayuh agi nembiak Dayak ngulihka pelajar ba institusi pelajar tinggi, iya deka mantu perintah betatika pemansang menua tu,” ku iya.
Kepala Menteri Pehin Sri Abdul Taib, ku iya, selalu ngemeratka pemansang mudal mensia nengah pelajar.
Penemuai SDGA nya deka mai Jabu datai ngagai aum besai tiap taun nya kena 21 Februari tu ila ba Hotel Telang Usan.
SDGA bisi lebih 400 iku raban angka kediatu. - Berita Iban, Utusan Borneo
7 Februari 2009

Baum Ngulih ke Endur Centre Gereja St Mary Jalai Matang Kuching

Baum merambuka muka’ Centre Gerja St. Mary Jalai Matang, Kuching udah diaduka kena 4/1/2009 maya jam kira pukul 2.30 lemai ba rumah chairman Mr. Steward Dawi di Lorong 6A6 Taman Peony Matang Jaya. Bala komitika bisi datai lebuh maya tu tadi baka Mr. Low Marin (secretary), Mr. Isau Omar, Mr. Ajol Aman, Mr. James Ningkan, Mr. Randy Minggu, Mr. Morgan Batai, Mr. Andrew Gani, Mr. Johannes, Mr. William, Lay Reader Ami Umuh enggau Lay Reader Peter Anis, enggau bala raban bini komiti mega sampal bisi datai.
Batang aum maya nya kemari merambuka chara enggau ngiga endur ti patut muka’ centre Gereja St. Mary sebedau ngaga rumah Gereja ti dijuluk ati bala raban komiti enggau semua raban kitai orang kristian Anglica semanjai jalai matang sampai ngagai batu 12 matang ditu.
Bejakuka chara ngulihka centre nya, chairman madahka siti lot apartment ba Blok J Synergy Square deka di lelong EON Bank ngena rega ti patut sereta disadangka dalam penyampau ti ulih disatup gerempung tu. Bala komiti sama bela setuju ke anggur enggau endur ti diperambuka kemaya tu kemari ba Blok J Tingkat 1 Synergy Square Jalai Matang. Bala raban komiti sama bela diasuh meresa endur tu meratika penau enggau pengenda endur tu ambi ke centre.
Aum tembu kira jam 4.30 lemai lalu udah semua utai dipesetujuka olih bala komiti, chairman merambuka deka baum baru kena ari minggu 11/1/2009 ti deka datai tu ila.

SELAMAT HARI KRISMAS & TAUN BARU 2009

CHRISTMAS CAROLING di Wisma Seberkas Kuching

AKU NGARIKA RABAN CAROLERS ARI ST MARY CHURCH JALAI MATANG MERI SELAMAT HARI KRISMAS ENGGAU TAUN BARU 2009 TI DEKA DATAI NGAGAI SEMUA KITA TI BISI NGELAWA BLOG AKU TU. NGARAPKA PENATAI JESUS KRISTUS KA DUNYA TU MAYA TU KELIA MERI PEMUJUR ENGGAU PENGELANTANG NGAGAI KITA SEBILIK ENGGAU SEMUA ORANG KRISTIAN DI DUNYA TU. SELAMAT HARI KRISMAS ENGGAU TAUN BARU.

Pengingat Maya "Christmas Caroling"- Gereja Anglika St Mary’s, Jalai Matang, Kuching

Munyi ku jaku ribai,

“ It comes every year and will go on forever. And along with Christmas belong the keepsakes and the customs. Those humble, everyday things a mother clings to, and ponders, like Mary in the secret spaces of her heart." ~ Marjorie Holmes, American writer

Perambu nama Gereja St. Mary’s, Jalai Matang tu udah di lancarka Bishop Boly Lapok kena 15/08/2008 tu tadi. Chairman Gereja St. Mary’s, Jalai Matang ke diatu iya nya Mr Steward Dawi. Lalu sapit Chairman Mr. Ajol Aman. Secretary Mr. Lo Marin.

Musim Krismas udah datai! lalu bakanya mega pengawa caroling ba Gereja St. Mary Jalai Matang ke taun 2008 tu udah berengkah diatur kena 5/12/2008 lalu dijangka tembu kena 20/12/2008. Rampa taman rumahka bisi kena pansa pengawa caroling ke taun tu baka semua Taman genturung pendiau di Matang Jaya, Taman Yen Yen, Taman Ko-Perkasa, Taman Sri Matang, Taman Suria Jaya, Taman Heng Guan, Flat Batu 5, 6 enggau Flat Batu 9 Jalai Matang, Kampung Gita A & B, Taman Mawar, Laruh Scheme enggau Taman Genesis. Bala carolers ari St. Mary’s Church mega bisi nerima serta ngambi peminta datai caroling ngagai rumah sida iya, ari sebelah menua Kuching tu kena nyediaka diri ti deka nyambut hari Christmas ti deka datai tu ila. Pengawa Caroling tu endang selalu diatur nyerinting taun ba rampa taman di semanjai jalai Matang ditu. Ke taun tu Chairman Caroling St. Mary’s Church, Jalai Matang Mr. Andrew Gani ngembing bala carolers bejalai ngelawa rumah bala raban kristian anglika di jalai Matang ditu. Bala raban komiti St. Mary’s Church enggau naka ulih ngaduka pengawa coroling tu ngambika semua raban anglika ti bisi muka pintu rumah sida iya di pasuk magang, nadai tinggal. Penatai bala carolers endang disambut enggau cukup basa olih bala raban kristian ba taman pendiau di rampa menua di jalai Matang ditu.

Ngena pengawa caroling tu mega bala raban komiti Gereja St. Mary ngarapka kaul sereta runding bala raban kitai urang kristian ditu ulih rapat agi enggau pangan diri kena ngemajuka Eklisia kitai ti ngelingi jalai Matang ditu. Baka ti ditulis St Luke dalam Injil iya ba baruh tu,

Luke 2:1-14

Lebuh maya nya Rajah*Besai Augustus meri ukum ngagai semua orang dipegai iya, ngasuh sida nganjung nama diri awakka kena itung lebuh ngitung tubuh. Lebuh pengawa ti ngitung tubuh nya terubah dikereja, Kurinius nyadi gabenor di menua Siria. Nya alai genap iku sida bela nganjung nama diri, ngagai nengeri sida empu.
Josep angkat ari nengeri Nasaret* di Galili, ngagai Batlehem, dalam menua Judah, endur Rajah David ada. Josep mansang kia, laban iya datai ari peturun David. Iya mansang nganjung nama iya enggau nama Maria ti tunang iya. Nyadi Maria betubuh bisi, lalu lebuh seduai di Bethlehem, iya nyau chukup bulan endur beranak. Iya ngadaka anak lelaki iya ti tuai, medung anak mit nya ngena kain lalu ngalika iya dalam dulang sapi, laban rumah numpang udah penuh-nadai bilik puang.

Dikandang endur nya bisi sekeda pengibun bedus ti bemalam di padang, ngintu raban jelu tupi sida. Siko melikat* Tuhan ayan ba sida, lalu mulia Tuhan manchar atas sida. Sida balat takut, tang ku melikat nya bejaku enggau sida,”Anang takut! Aku datai kitu nusui berita manah ke kita, ti deka mai pengaga ngagai semua urang. Sahari tu, di nengeri David Pengelepas kita udah ada-Kristus* ti Tuhan! Nyadi tu ke kelai kena madah ke utai nya ngagai kita: kita deka nemu siku anak mit dibendung ngena kain, lalu gali dalam dulang sapi.”
Kemaya nya mayuh bala serega* pegari enggau melikat nya, bepantun muji Allah Taala:

“Pujika Allah Taala di serega ti pemadu tinggi, lalu lantang orang ti diau di dunya, ti dikerindu ka iya!

SELAMAT HARI KRISMAS ENGGAU TAUN BARU 2009 TI DEKA DATAI TU.......!

Pasar Tamu Lachau

Tentu kita nemu dini endur menua Lachau tu laban endur tu selalu di pansa kitai di pulai ari menua diri kelebih agi bala orang ti gawa di menua Kuching.

Lachau tu ba pegai menua Sri Aman kira-kira bisi 20 kilometer ari simpang Sri Aman. Pasar tamu tu endang nyadi ke siti endur ke enda tau enda di lawa orang mayuh ti ngetu ba pasar Lachau. Nama kebuah orang selalu ngetu ditu, laban endur tu nyediaka alai makai enggau ngirup ka genap orang ke ngetu belelak udah bekau ke bejalai jauh pulai kemenua tauka pulai ari menua diri. Tambah mega sida iya ulih ngiga sayur enggau jelu babas baka babi babas enggau kijang lebuh orang ke bisi bulih lebuh begiga ke babas. Sayur kampung ti bisi dijual ditu baka kantuk entekai, kantuk entimun, sayur sawi, buah terung iban enggau cina, sayur ensabi, sayur bendi, buah entekai, buah petola enggau mayuh macham sayur bukai. Kitai mega tau meli ikan sungai baka ikan keli, tapah enggau baung ba pasar tamu ba Lachau tu. Sida mega bisi nyual pekasam ikan tapah ba pasar tamu tu.

Sapa enda ngelala salai ikan lajung? Ditu meh endur kita tau bulih salai ikan tu enggau rega ba takat RM5 enggau RM10. Anang enda meli salai ikan lajung nyamai kena nyampur sayur kampung enti digagaka sup, baka sup kantuk entekai, entimun, enggau sayur sawi lalu tau di beli kitai ba pasar tamu tu mega.

Enti lebuh musim buah baka dalam ujung bulan October ngangai semanjai bulan November 2008 tu tadi kitai tau meda bemacham buah bisi dijual pa pasar tamu enggau pasar Lachau tu. Kelebih agi raja buah, buah rian sigi mayuh dijual enggau rega ke patut serta ulih dibeli orang mayuh ti ngetu ditu. Bansa buah ke bisi dijual baka buah rambutan, buah kemantan, buah isu, buah pakan, buah kembayau, buah dabai, buah sikup enggau mayuh macham buah bukai mega.

Enti kita datai ari menua Berunei, Miri, Bintulu, Sibu tau mega negetu ditu belelak enda lama. Aram meh kitai sama meli utai ke bisi dijual ditu awakka sama nyukung madung bansa kitai ke bisi enggau orang nyual utai ditu. Nyau ampir semua orang ke bejual ditu bansa kitai iban. Sama-sama meh kita besaup nyukung 'activity' ekonomi ba district tu taja pan kitai semina mansa tauka ngetu ba endur tu.