GERIJA ST MARY FUND RAISING DINNER 2009

Fund raising dinner taun tu udah digaga kena 15/08/2009 beserimbai enggau setaun St. Mary's Church Jalai Matang udah di tumbuhka.


Penyanding penemu tauka chairman Fund . Raising Dinner 2009 tu betuaika Cikgu Ajol Aman.
Patron Fund Raising Dinner 2009 ianya Y.B Hj. Fadillah bin Haji Yusof, Ahli Parlimen P194, Petra Jaya, Timbalan Menteri, Kementerian Sains, Teknologi dan Inovasi enda ulih datai laban ti bisi pengawa bukai ti enda ulih diseliah. Taja pan pia iya diganti setiausaha politik iya empu iyanya, En. Daniel Jubang ak Datuk Kenneth Kayan.
Bala VIP ti sama bisi datai ba pegarami begelumu makai malam tu mega baka The Very Reverend,Aeries Sumping Jingan (Assistant Bishop Designate) enggau bini iya, enggau Fr. Lipson Timbang.
Penatai setiausaha politik YB disambut Chairman En. Steward Dawie, Sapit Chairman En. Ajol Aman enggau bala raban komiti sereta semua bala ti bisi enggau ba pengawa begelumu makai malam bebala mayuh ke lemai nya. Iya datai kena 7.30 lemai enggau nya pengawa ba lalu berengkah digaga.
Tuju pengawa Fund Raising Dinner tu digaga deka dikena kami ke ngelingi Jalai Matang tu ngumpul belanja dikena ngemansangka pengawa gerija St. Mary's Jalai Matang. Kelebih agi anggur pengawa kami ti deka nirika Gerija ba sebidang tanah ke nyadi agenda lumur satu bala raban komiti ke diatu. Fund Raising Dinner ke taun tu nyampau mija ke dibeli orang mayuh kira bisi sembilan puluh tujuh (97) iti. Lalu rega siti mija iya nya RM350.00.

Program makai begelumu bala mayuh ke malam nya berengkah enggau jaku pengalalu ari Chairman St. Mary's Church En. Steward Dawie, ngelaluka penatai semua bala mayuh ti bisi sama-sama bebelika meja kena nulung sereta mantu semua pengawa ti tau ngemajuka gerija tu dudi ari ila. Iya meri terimakasih ke pemanah ati sereta bantu ti diberi lalu ngarapka sukung sida iya enda semina ke malam nya aja tang betampung ngagai taun-taun ti deka datai.
Iya mega bisi mansutka peminta ari bala ti diau ba genturung semanjai Jalai Matang ti minta sebidang tanah ambika bisi endur nirika rumah gerija. Enggau bantu sereta tulung ari YB kami ke diau digenturung jalai Matang ditu ngarapka iya ulih meri jalai kena minta lalu tau bulih ke utai ti di juluk ati bala mensia manyuh ditu.
Udah tembu Chairman meri jaku pengelalu iya dia gintir The Very Reverend, Aeries Sumping Jingan meri jaku perasang sereta madah kati chara enggau gaya Gerija besai St. Thomas ulih mantu bala komiti Gerija St. Mary's ti minta tanah awakka bisi endur nirika gerija nya ila. Iya mega madahka langgur Gerija besai ti deka ngaduka, enti sema Gerija tu udah bediri ila, sida deka ngambi iya nyadikan 'centre of Anglican activity' kelimpah ari St. Basil, di Batu Kawa. Dikena iya ngujungka jaku iya malam nya dia iya meransang bala komiti bebendar agi ngereja pengawa laban pejalai agi jauh.


Udah tembu The Rev. Aeries Sumping bajaku nya baru gintir En. Daniel Jubang ak Datuk Kenneth Kayan mega bejaku ngarika YB Haji Fadillah b Hj. Yusof lalu macha text ti udah di tulis ke iya. Dalam text ti dibacha dia YB madahka pengawa bala komiti ti minta tanah nyadika top priority iya ketaun 2010 ru ila. Laban iya deka nentuka utai ti dipinta nya tau bulih nitihka juluk ati bala mensia mayuh. Kena iya ngujungka jaku, dia Mr Kenneth madahka YB bisi pemeri kena nambahka fund Gereja St. Mary.

En. Daniel Jubang ak Datuk Kenneth Kayan
macha text YB Haji Fadhillah Haji Yusof

Tembu iya meri jaku peransang dia pengawa ngetak kek birthday gerija St Mary pan lalu digaga diulu ke Chairman, Rev Aeries Sumping, Fr. Lipson enggau semua bala raban komiti gerija.

Chairman En. Steward Dawie nyuaka Souvenir ngagai En. Daniel Jubang

Udahnya Chirman lalu nyuaka Souvenir ngusung En. Daniel ke tanda terimakasih ari komiti Gerija St Mary.

Bala raban komiti enggau En. Daniel Jubang, Rev. Aeries Sumping & Bini, Chairman Steward Dawie, Fr. Lipson Timbang & Cikgu Ajol Aman (Penyanding FRD 2009)

Kek Birthday Gerija St. Mary Jalai Matang Kuching

Nanyi lagu Birthday Gerija St. Mary Jalai Matang Kuching

Ngerat Kek Birthday Gerija St. Mary Jalai Matang Kuching

Bala mayuh lalu di idang ke pemakai udah bekau pemakai diberekatka Fr. Lipson Timbang. Menu makai ke malam nya cukup ngemuaska semua bala ti bisi datai. Sida mega diperindang penanyi ti disponsor bala mayuh. Penanyi baka Margaret M. Jalang mega bisi datai sama enggau meli mija ba pengerami fund raising tu tadi lalu di sponsor belagu olih orang mayuh baka ke malam nya.

Kami bala komiti Gerija St. Mary Jalai Matang ngarapka orang mayuh terus mantu lalu sukung kita amat diberi terimakasih.

SELAMAT HARI GAWAI DAYAK TAUN 2009

SELAMAT GAWAI DAYAK .OH HA.........
Lama udah enda nulis ba blog aku tu. Nadai tentu ‘issue’ ti tau dikunsi enggau kitai raban mayuh, tang maya hari manah baka hari Gawai ti deka di intu kita berengkah hari malam 31/05/2009 tu lagi aku enggau kami sebilik meri SELAMAT HARI GAWAI DAYAK ngagai semua kitai bansa dayak diserata menua Malaysia kelebih agi di menua SARAWAK BUMI KENYALANG tu.
Aku besampi ngarapka hari Gawai taun tu mai berekat, mai tuah, pengerai, enggau pemaik ngagai semua mensia di serata dunya tu. Kena aku ngujungka pesan Selamat Hari Gawai tu, aku mai kitai sama beratika leka jaku ke ditulis nundaka jaku dalam bup kudus ba senentang Ulang Adat 28:1-14
Enti kita ngasika Tuhan ti Allah Taala kita lalu ngintu enggau ati ti tetap semua pesan iya ti diberi aku ke kita sari tu, iya deka ngasuh bansa kita lebih besai ari semua bansa bukai dalam dunya tu. Ngasika Tuhan ti Allah Taala kita, lalu kita deka empu berekat iya ti munyi tu:
“Tuhan deka merekat ke nengeri enggau kebun kita. Allah Taala deka ngasuh kita beranak betelesak, kita deka buli padi, bulih sapi enggau bedus. Tuhan deka merekatka padi enggau pemakai ti digaga kita ari utai nya. Tuhan deka merekatka semua pengawa ti dikerja kita. Tuhan deka ngalahka munsuh kita lebuh sida nyerang kita. Sida deka datai ari siti jalai nyerang kita, tang sida deka pambar lari ari kita, nengah tujuh iti jalai. Tuhan ti Allah Taala kita deka merekat ka pengawa kita, lalu ngisi ema kita enggau padi. Iya deka merekat ka kita ba menua ti diberi iya ke kita.
Enti kita ngasika Tuhan ti Allah Taala kita lalu ngereja utai nunda ke pesan iya, nya baru iya deka ngaku kita nyadika anembiak iya nunda ti udah di semaya iya. Ari nya baru semua mensia dalam dunya deka nemu Tuhan amat udah milih kita nyadika anembiak iya, lalu sida deka takut ka kita. Tuhan deka ngasuh anak kita nambah-menambah, jelu tupi kita deka mayuh, kita deka bulih padi dalam menua ti disemaya iya ngagai aki ini kita, ti deka diberi iya ke kita. Iya deka ngasuh hari ujan nitihka maya. Iya deka merekatka semua pengawa kita, ngambika kita bisi utai dijali ngagai raban bansa bukai, tang kita empu enda nyanda ari sida. Tuhan ti Allah Taala kita deka ngasuh kita nyadika tuai semua raban bansa bukai, ukai nyadika anembiak sida. Enti kita nitihka semua pesan iya ti diberi aku ke kita sehari tu, kita deka selalu maju lalu enda nemu surut. Tang kita anang ngelanggar pesan nya enggau sebarang jalai, tauka nyembah lalu betuaika petara bukai.”

Baum enggau YB Tuan Hj. Fadillah Hj Yusof Sapit Menteri Sains, Teknologi & Innovasi Malaysia

Hari ti dianti betemu enggau YB Tuan Hj. Fadillah Hj. Yusof pan datai nitihka disemaya iya enggau bala raban komiti gerempung Gereja St. Mary, Jalai Matang, Kuching ti ngepunka aum senentang peminta pasal tanah endur tiang pemun gereja St. Mary iyaka udah diperambuka dalam bulan Lapan 2008 tu tadi.

Kena hari enam 7/3/2009 bala raban komiti ti betuaika Sapit Chairman Cikgu Ajol Aman enggau bala raban komiti bukai bisi datai ngusung opis PBB Parlimen P194 Petra Jaya ba Jalai Astana, Kuching. Bala raban ti datai kia di sambut ‘Personal Secretary’ YB iya nya Mr. Moshidi enggau bala staf iya enggau chukup basa. Kami datai dia kira iya jam 9.25 pagi. Bala raban komiti ti sama bisi datai pagi nya baka Mr. Low Marin (Secretary), Mr. Isau Omar ( Treasurer), Mr. Peter Anis (Lay Leader), Mr. Nanta Gisang, Mr. Anyau Belun, Mr. Andrew Gani, Cikgu Morgan Batai enggau Mr. Kembah Wah. Kami lalu dibai personal secretary YB Tuan Hj. Fadillah ngagai opis endur baum ba tingkat 3 semadika nganti penatai YB. Kami diberi ai kopi enggau teh sereta enggau kuih mimit kena betunga sereta berandau. Kelimpah enggau nya Mr. Morshidi bisi nerangka mimit ngagai bala kami sebuat pasal pengawa enggau aktiviti ujung minggu YB bekau iya ti pulai bejalaika pengawa iya ari seberai (Semananjung Malaysia) nyadi ahli parlimen.
Tuju penatai kami sebuat iya nya nampung peminta gerempung kitai di Jalai Gita/ Matang Jaya ti deka ngaga Gereja lalu begunaka tanah ti numbas iya pemesai endur ngentak tauka pelasar Gereja St Mary nya ila. Perambu peminta tu udah lama di anjung, laban ti tekul ulih pengawa iya ba kementerian, YB lalu apin bisi awak ulih betemu enggau bala raban komiti kelimpah ke hari enam tu tadi.
Kira jam 10.15 pagi YB pan datai. Udah ke bekelala enggau bala kami ti datai dia pagi nya YB pan terus berandau ke pasal peminta ti udah diperambuka bala raban kitai ngelama tu. Tang laban semua perambu peminta endang sigi udah lama diberi, nya alai iya semina meri lalu madah utaika patut digaga ngambika peminta nya ulih lengkas teputar. YB ngasuh bala raban komiti nyediaka penyampau raban kitai orang kristian ba rampa genturung pendiau ditu enggau sapa ti dikarapka megai gerempung tu (Office Bearer). Iya madah ngagai personal secretary iya utaika patut digaga kena nyukung peminta kitai ngagai orang ti bisi kuasa serta ulih ngemujurka peminta tu. Penudi sekali iya madahka enti semua utai ti diasuh iya udah disedia serta bisi magang YB madahka iya empu deka enggau bala komiti betemu enggau Sapit kepala Menteri iya nya Tan Sri Datuk Patinggi Alfred Jabu ak Numpang. Aum kami enggau YB tembu kira jam 10.45 pagi, kami sebuat lalu nyurutka diri laban kami nemu agi bisi orang bukai deka betemu enggau iya kelimpah ari raban kami nya tadi.

Centre Gereja St Mary Matang Jaya

Perambu ti deka ngaduka Centre ba genturung pendiau sepemanjai jalai Gita/Matang diatu udah nyadi nyata, lalu endur centre nya diaduka ba pasar Matang Jaya, Kuching.

Kitai bala raban kristian anglika ke diau di genturung sepemanjai Jalai Gita ngagai Jalai Matang tau datai ditu besambiang tiap hari minggu jam 8.00 pagi. Kita tau datai ngagai Apartment Unit No. 88A (Tingkat 1 ba mua) Blok J, Synergy Square, Jalai Matang Kuching. Endur tu ulih muat lebih kurang 80 iko orang lebuh sekali-sekali sembiang. Sembiang tiap hari minggu ditu deka di iring Fr. Lipson Timbang.

Centre Gereja St Mary Matang Jaya tu dibuka lalu di ‘blessing’ kena 28/02/2009 olih Archdeacon Micheal Buma, lalu pengawa sambiang mass mega diatur beserimbai enggau pengawa ‘opening ceremony’ nya. Nyampau raban kitai kristian anglika ke sama-sama bisi enggau datai ngerami pengawaka malam nya bisi 99 iko. Bala ti datai udah tembu sembiang mass lalu di beri makai enggau ngirup olih bala raban komiti ti ngukun gerempung kitai ba genturung pendiau ditu.
Malam nya Archdeacon kitai bisi mansutka jaku madah ngasuh kitai di genturung pendiau semanjai jalai Gita enggau Matang ditu meruan begerempung enggau pangan diri ngambika pengarap kitai majak ngerembai lalu di temu orang mayuh.
‘Tu meh gereja kita, tajapan iya dikumbai centre, laban tu meh ke udah diberi Tuhan kitai endur kita berandau serta besampi pasal pemesai kuasa Tuhan ngagai kitai mensia di dunya ditu. Gereja Moden, nunda, tauka nitihka pemansang dunya kemaya hari tu sebedau kita ditu ke bulih tanah endur kita nirika Gereja ti besai agi.” ku Fr. Micheal Buma, malam nya. Pia mega iya mesan laban tu nama aja ke centre tang iya endang ambika gereja ke raban kitai ti diau semak ditu, endur enda tau enda ngaduka sambiang tiap hari minggu baka ti ba Gereja besai kitai di St Thomas Cathedral ba Jalai Mc Dougall, Kuching.
Sambiang hari minggu ke terubah udah digaga ba centre tu kena 8/3/2009 lalu penyampau orangka bisi datai maya tu kemari bisi 69 iko. Bala raban komiti ngarapka semua kitai raban kristian anglicaka diau semak jalai Gita/Matang ditu sama bela ulih nganataika diri besambiang ba minggu ti deka datai ila.

Jalai Bedayaka Mayuh Nembiak Masuk Universiti

Kuching: Aum besai Tiap Taun Gerempung Graduan Dayak Sarawak (SDGA) deka mutarka bakani deka ngulihka mayuh agi biasiswa kena nulung mayuh agi nembiak sebansa nyambung sekula sida iya ngagai universiti.
Presiden SDGA, Dr. Joseph Jawa Kendawang madahka atur nya kena nambah pemayuh anak bebansa Dayak ngulihka pelajar tinggi, lalu mantu ngangkatka tikas ekonomi.
“Entara pelan strategik lima taun kami ke deka dipejuraika ba aum nya bekait enggau pelajar.
“Kami ngarapka JPA (Jabatan Perkhidmatan Awam) deka meri mayuh agi biasiswa ngagai nembiak Dayak,” ku iya madah ba aum nya ngagai media lebuh iya meri basa ngagai Sapit Kepala Menteri Datuk Patinggi Tan Sri Alfred Jabu ditu, kemari.
Ku Jabu, SDGA ke betatika deka ngemansangka pelajar nya nitihka atur perintah ke deka ngeluarka mayuh agi raban Dayak ke pandai.
Tu pan manah kena ba Koridor Kuasa Taun Dikena Baru (Score) ke deka begunaka mayuh orang ke bisi pengelandik ba semua bidang.
“Enggau atur pengawa SDGA ke ngasuh mayuh agi nembiak Dayak ngulihka pelajar ba institusi pelajar tinggi, iya deka mantu perintah betatika pemansang menua tu,” ku iya.
Kepala Menteri Pehin Sri Abdul Taib, ku iya, selalu ngemeratka pemansang mudal mensia nengah pelajar.
Penemuai SDGA nya deka mai Jabu datai ngagai aum besai tiap taun nya kena 21 Februari tu ila ba Hotel Telang Usan.
SDGA bisi lebih 400 iku raban angka kediatu. - Berita Iban, Utusan Borneo
7 Februari 2009

Baum Ngulih ke Endur Centre Gereja St Mary Jalai Matang Kuching

Baum merambuka muka’ Centre Gerja St. Mary Jalai Matang, Kuching udah diaduka kena 4/1/2009 maya jam kira pukul 2.30 lemai ba rumah chairman Mr. Steward Dawi di Lorong 6A6 Taman Peony Matang Jaya. Bala komitika bisi datai lebuh maya tu tadi baka Mr. Low Marin (secretary), Mr. Isau Omar, Mr. Ajol Aman, Mr. James Ningkan, Mr. Randy Minggu, Mr. Morgan Batai, Mr. Andrew Gani, Mr. Johannes, Mr. William, Lay Reader Ami Umuh enggau Lay Reader Peter Anis, enggau bala raban bini komiti mega sampal bisi datai.
Batang aum maya nya kemari merambuka chara enggau ngiga endur ti patut muka’ centre Gereja St. Mary sebedau ngaga rumah Gereja ti dijuluk ati bala raban komiti enggau semua raban kitai orang kristian Anglica semanjai jalai matang sampai ngagai batu 12 matang ditu.
Bejakuka chara ngulihka centre nya, chairman madahka siti lot apartment ba Blok J Synergy Square deka di lelong EON Bank ngena rega ti patut sereta disadangka dalam penyampau ti ulih disatup gerempung tu. Bala komiti sama bela setuju ke anggur enggau endur ti diperambuka kemaya tu kemari ba Blok J Tingkat 1 Synergy Square Jalai Matang. Bala raban komiti sama bela diasuh meresa endur tu meratika penau enggau pengenda endur tu ambi ke centre.
Aum tembu kira jam 4.30 lemai lalu udah semua utai dipesetujuka olih bala komiti, chairman merambuka deka baum baru kena ari minggu 11/1/2009 ti deka datai tu ila.

SELAMAT HARI KRISMAS & TAUN BARU 2009

CHRISTMAS CAROLING di Wisma Seberkas Kuching

AKU NGARIKA RABAN CAROLERS ARI ST MARY CHURCH JALAI MATANG MERI SELAMAT HARI KRISMAS ENGGAU TAUN BARU 2009 TI DEKA DATAI NGAGAI SEMUA KITA TI BISI NGELAWA BLOG AKU TU. NGARAPKA PENATAI JESUS KRISTUS KA DUNYA TU MAYA TU KELIA MERI PEMUJUR ENGGAU PENGELANTANG NGAGAI KITA SEBILIK ENGGAU SEMUA ORANG KRISTIAN DI DUNYA TU. SELAMAT HARI KRISMAS ENGGAU TAUN BARU.