SALAM DAYAK BERSATU

Kunsi ari FB-John Brian Anthony

Gambar Pengias

SEBANA ANAK DAYAK DIPEGAI BARISAN NASIONAL - PBB

Tu sebana aku, anak Dayak, anak Iban ti lama udah dipegai Perintah Barisan National. Lebih 40 taun aku meda chara Barisan Nasional ngemelu serta ngenudika bansa aku enggau menua aku Sarawak. Tu meh "report card" ari aku ngagai perintah Barisan Nasional enggau penerang ari aku nama kebuah aku enggai agi ngundi Barisan Nasional:

1) Lebih 40 taun, BN becipingka Dayak ari segi pemayuh orang kerja perintah. Taja Dayak tu rayat ti pemadu mayuh di menua Sarawak, tang ari segi orang kerja perintah, sida mimit. Nama kebuah bansa aku dikemelu enggau dikenudika BN?

2) BN becipingka Dayak ari segi niki pangkat dalam upis perintah. Taja orang Dayak mayuh tang sida tu orang ti pengabis mimit bepangkat tinggi dalam upis perintah. Enda patut ga bansa aku bangat nadai pemintar enggau pemendar gawa. Tauka tu endang pengawa ti disengajaka dikena nentuka bansa aku tinggal belama.

3) Lebuh aku beratika orang ti dipadu nyadi gabenor menua Sarawak, dalam 55 taun Sarawak udah merdeka, nadai sekali bansa Dayak kala dipaduka nyadi gabenor.  Pengawa nya nadai tusah. Orang ke bisi peneleba gawa, dipebasaka orang mayuh serta ditemu lurus ngerja pengawa ulih magang ngerja pengawa nya. Nama kebuah dalam kandang 55 taun, sekali pan nadai meh Dayak diberi peluang mangku pengawa nya. Enda patut ga nadai siku ari satu juta lebih bansa Dayak nadai layak. Tauka tu polisi BN ti ngemelu enggau ngenudika bansa Dayak.

4) Bansa Dayak mega dikechipingka ari segi pemayuh nembiak masuk kolej enggau universiti. Tu terang dipeda ba kampus UNIMAS, UiTM enggau UPM di Sarawak. Pengawa tu baka ti disengajaka laban tu chara ti pemadu efektif dikena ngenudika bansa Dayak dalam semua aspek.

5) Ari segi scholarship, bansa Dayak mega nadai mayuh diberi scholarship dibandingka enggau bansa bukai.

6) Perintah BN beka-enggai serta baka ke sengaja ngelubahka pengawa ngaga undang-undang ngaku Pemakai Menua enggau Pulau Galau (PMPG). Kategal tu bansa Dayak alah bechara ba Federal Court lalu sida lenyau hak ba PMPG sida.

7) Ni kita bala YB bansa Dayak dalam BN? Kita baka ke buta, baka ke benggal, baka ke takut enda nemu bejakuka ishu ti ninggang bansa Dayak baka ke disebut di atas? Tau ka kita endang enda beduli bansa Dayak lalu sengaja ngaga bansa Dayak dikemelu, dikenudi enggau dipesaupka, ngambika bansa Dayak semina layak nyadi kuli berari.

8) Sepengelama BN megai perintah,  Bansa Dayak lalu bedau bisi chanel TV enggau radio ti 24 jam baka ke dikemisi bansa bukai. Nama kebuah bansa bukai bisi lalu bansa Dayak nadai?

9) Perintah BN Sarawak nadai serious deka mulaika jaku English nyadi "medium of instruction" ba sekula.

10) Perintah BN Sarawak nadai serious deka mulaika kuasa Sarawak ngulihka minyak enggau gas. Udah betaun-taun ishu tu dikejakuka, tang nadai ga ubah.

11) Semua rayat, kelebih agi bansa Dayak nyau majak meskin kategal rega barang balat niki enggau rega Ringgit balat nurun. Tu nyadi kategal polisi BN ti ngasuh rayat dipaksa mayar GST dikena nyaup perintah mayar utang 1MDB. Reti tu, kategal polisi BN, kami orang meskin dipejal mayar utang orang kaya. Kategal polisi BN tu, nembiak skula, orang ke nadai bekerja, orang ke udah pinchin enggau orang ke mutus seput mega mayar GST.

12) Perintah BN sengaja enggai mansik penyalah orang ke bekuasa megai 1MDB taja menua bukai udah bedawa orang ke salah ngena kuasa besangkutpaut enggau 1MDB. Rayat nemu nama kebuah BN enggai mansik tu. Maya udah datai endur aku patut milih perintah baru, perintah ti sanggup mansik serta bedawa orang ke salah mai 1MDB rugi serta beutang besai.

13) BN megai menua tu ukai ngena duit sida empu tang ngena duit rayat ti digumpul ari chukai, nyengkaum GST. Enti parti penyakal menang, sida deka nyadi perintah lalu bekuasa atas duit nya. Kategal nya aku nadai irauka parti penyakal ke diatu nadai duit dikena merintah menua tu.

14) Diatu menua Selangor enggau Pulau Penang ukai dipegai BN, tang sida maju. Sarawak mega tau nyadi lebih maju enti ukai dipegai BN agi.

15) Ngelama tu BN madahka pemansang semina ulih dipejalaika enti parti ti merintah nadai betukar. Tang rayat nemu. Menua Jipun, Menua USA, Menua UK enggau mayuh menua bukai suah betukar parti ti merintah, tang sida maju. Betukar parti merintah nya manah ka rayat enggau ka menua.

16) Sarawak jauh tinggal ari segi pemansang kategal polisi pemansang BN. Baru diatu BN ngaga Pan-Borneo Highway. Anang ngumbai rayat enda nemu, project tu 30 taun dudi ari project highway utara-selatan di Malaya. Kategal tu rayat Sarawak diatu balat tusah kategal aktiviti ngaga highway nya. Lapa enda ngaga project nya 20 taun tu ke udah? Lapa enda ngaga highway nya ngerenchah tempat baru ari ke niti jalai ti lama? Orang Malaya nadai ishu baka tu. Enti sida ngaga highway baru, sida ngerenchah tempat baru lalu enda ngerusak jalai ke udah bisi. Tu meh utai ke patut dikerja enti sema "proper impact assessment"  digaga. Jalai lama nya patut enda digeruga. Diatu jalai nya balat jai. Highway baru patut ngerenchah tempat baru ngambika jalai lama enda rusak lalu enda ngerusak rayat. Kategal tu mega, mayuh orang ti diau tisi jalai diasuh pindah tang enda dipampas enggau chukup. Bisi sekeda lalu bedau tegagaka rumah baru lalu nadai kuasa eletrik disambung laban ungkus ngaga rumah baru enggau nyambung kuasa eletrik baru kelalu tinggi. Jaku tu ukai madahka diri ngenggaika Pan-Borneo Highway, tang ngenggaika chara ia dipejalaika, ianya chara ti enda ngambi kira pemisi enggau penusah rayat.

BN oh BN. Nuan udah merintah 45 taun. Enti baru 5 - 10 taun BN udah merintah, aku ulih nerima nama kebuah Dayak enggau Sarawak tinggal. Tang BN udah merintah 45 taun. Aku udah leju ninga "excuse" BN.

Aku enda ulih nerima Dayak enggau Sarawak dikemelu enggau dikenudika agi.

Sebana tu ukai ngarapka bansa Dayak diduluka ari bansa bukai, tang ngarapka Dayak diibuhka sama rata, sebaka enggau bansa bukai, ukai dikemelu enggau dikenudika berari, baka ke udah diasaika sekumbang BN megai perintah.

Kategal nya, maya udah datai endur aku ngelengkaka BN.

Berengkah ari diatu, Aku enggau kami sebilik badu ngundi Barisan Nasional.

Aku, Dayak ti dikemeli enggau didudika BN

Credit To: Voice Of The Dayak